ინტერიერში ფრანგული სტილი არის ეთნიკური,და არა ისტორიული. აქედან გამომდინარე, დიზაინში, თავისუფლად შეიძლება იყოს წარმოდგენილი სხვადასხვა ისტორიული ხანის და სტილის გავლენა. შესაბამისად, ბაროკოს, კლასიკურისა და მოდერნიზმის დამახასიათებელი დეტალები ხშირად შეინიშნება ფრანგული სტილის სახლებში.

ბინის ფრანგულ სტილში მოსაწყობად იდეალური ვარიანტია - ბინა, რომელიც ფართო ოთახებით, მაღალი ჭერითა და დიდი ზომის ფანჯრებით ხასიათდება. დღესდღეისობით პოპულარული, სტუდიოს ტიპის ბინაში - ფრანგული ინტერიერი არც თუ ისე შესაფერისია, ვინაიდან ინტერიერის მთავარი არსი ცალკეულ და გამოყოფილ განლაგებებშია.

ფრანგებს არ მოსწონთ სიმდიდრის დემონსტრირება, შესაბამისად ინტერიერშიც იშვიათად შეხვდებით მდიდრულ მასალებსა თუ გაფორმებებს, მასში ერთიანდება ბუნებრივი მასალები და ის საგნები, რომლებთაც აქვთ ისტორია. აქ თითოეული ნივთი ინდივიდუალურობით და უნიკალურობით უნდა გამოირჩეოდეს.

ინტერიერში, რომელიც ფრანგულ სტილშია გადაწყვეტილი, უნდა შედიოდეს რამდენიმე ანტიკვარული დეტალი. გაითვალისწინეთ: არ არის აუცილებელი მთლიანი ბინა ძველებური ავეჯითა და ნივთებით მოაწყოთ, თუმცა აღნიშნული დეტალი საცხოვრებელს უფრო მეტად დაახლოვებს ფრანგულ ატმოსფეროსთან. ასეთი ნივთების არარსებობის შემთხვევაში კი, ნუ იდარდებთ, დღესდღეობით, უამრავი სახის ანტიკვარული, ან თუნდაც დაძველების ეფექტით შექმნილი ავეჯია ხელმისაწვდომი.

ფორმები და ფერები:

ფრანგული ინტერიერის პალიტრა მარტივია, აქ თეთრი ფერი ფუნდამენტურია. კედლები, ჭერი, ავეჯი და დეკორი შესაძლოა თეთრი ფერის იყოს. დამატებით შეხვდებით ღია პასტელურ ტონალობებსაც.

ფრანგული სტილის ინტერიერის გაფორმებას შესაძლოა საკმაოდ ნეიტრალური ვუწოდოთ, ვინაიდან ოთახების ძირითადი ნაწილი თეთრ ან თეთრთან ახლო ტონალობებშია გადაწყვეტლი, გარდა იმისა, რომ აღნიშნული დეტალი საცხოვრებელს უფრო ღიასა და ჰაეროვანს ხდის, დამატებითი სარგებელიც გააჩნია, ასეთ ფონზე ავეჯსა და სხვადასხვა დეკორაციას, განსხვავებული ხიბლი ენიჭება და მუდამ ყურადღების ცენტრში რჩება.

საყურადღებოა, რომ ფრანგული ინტერიერი მზის სინათლეს ყველაზე მეტად საჭიროებს, მეტიც, სრულყოფილი ინტერიერის შესაქმნელად, ის აუცილებელიცაა. კლასიკური პარიზული ბინა, მთელი დღის განმავლობაში დიდი დოზით სარგებლობს „მზის სინათლით“, ამას უფრო მეტად ხელს უწყობს დიდი ზომის ფანჯრები და საცხოვრებელში შემავალი თეთრი ტონალობები.

ფრანგული სტილი არ ღალატობს თანამედროვე ინტერიერის პრინციპებს, რაც მიგვითითებს საცხოვრებელში სიმეტრიის არსებობაზე, დეკორით, ავეჯითა თუ სვეტებით, ამას არსებითი მნიშვნელობა არ აქვს, მთავარია შეიქმნას სასიამოვნო სიმეტრია. რაც შეეხება ავეჯს, თანამედროვე ფრანგულ ინტერიერში პოპულარულია მინიმალისტური ავეჯი.

მასალები ინტერიერში

ბუნებრივია, რომ ფრანგული სტილის ინტერიერში პარკეტს უდიდესი მნიშვნელობა ენიჭება, ვინაიდან მისი სამშობლო საფრანგეთია და პირველი პარკეტის შექმნაც ამ ადგილს უკავშირდება. თუ სახლში ძველი პარკეტის საფარია, თუნდაც არ იყოს საუკეთესო მდგომარეობაში, უნდა შეეცადოთ შეინარჩუნოთ და განაახლოთ იგი. ამ ტიპის იატაკი ფრანგული ინტერიერის საფუძვლად ითვლება, თუმცა მის გარდა არსებობს ერთადერთი ალტერნატივა და ეს - ლამინატია.

ფრანგულ ინტერიერში ნაზი და მსუბუქი ქსოვილები გამოიყენება, ესენია: აბრეშუმი, ხავერდი ატლასი და პოლიესტერ ტაფეტა, რომლებსაც ხშირად შეხვდებით სხვადასხვა ავეჯის, ფარდებისა თუ საძინებლის ზედაპირებზე.

ავეჯის საფუძველს, ფრანგულ სტილში ძირითადად ეკლექციზმი წარმოადგენს, ანუ  უნიკალური, მიზანმიმართული ნივთების არეულობა - საუკეთესო ატმოსფეროს შესაქმნელად. საკმარისია შეაგროვოთ სხვადასხვა სტილისა და პერიოდის ავეჯი, თუმცა გაითვალისწინეთ, რომ ოქროს შუალედის დაცვა აუცილებელია, რათა რომელიმე სტილი ზედმეტად არ წარმოჩნდეს და სხვა დეტალები არ გადაფაროს.

პოპულარულია ხალიჩების გამოყენება, ეს დეტალი ოთახს მეტ სიმყუდროვეს შესძენს, სასურველია, რომ ხალიჩის ფერი არ იყოს ამოვარდნილი ოთახში შემავალი ფერების პალიტრადან

სამზარეულო

ფრანგული სამზარეულო ბევრს მოსწონს, მისი ინტერიერის სიმსუბუქის გამო. ის გახლავთ როგორც დეკორატიული, ისე ფუნქციონალური. განსაკუთრებით საუკეთესო გარემო იქმნება მასშტაბური ზომის სამზარეულო ოთახებში - მაღალი ჭერითა და დიდი ფართობით, ეს ფაქტორი ხაზს უსვამს ფრანგულ ემოციას ინტერიერში. გამოიყენება:

• პასტელური ფერები
• ტექსტილის სიმრავლე
• მარტივი, თუმცა ყურადღებით შერჩეული დეკორი
• მცენარეები

ფართო ზონირებისთვის, გავრცელებულია: „სინათლით თამაში“ -  განათებული სამზარეულო და სასადილო ზონები, რომელიც რბილ და დიფუზიურ შუქშია ჩაფლული, ეს ხერხი სამზარეულოს რბილ ატმოსფეროს შესძენს და აქ ყოფნაც უფრო სასიამოვნო გახდება.

ფერის დიზაინი ამ სტილისთვის საკმაოდ მნიშვნელოვანი საკითხია, ტრადიციული თეთრის გარდა, გამოიყენეთ შემდეგი ტონალობები:

• კრემისფერი
• კარამელის
• შოკოლადის
• ვერცხლის
• ღია ვარდისფერი

ფრანგულ სამზარეულოში იშვიათად შეხვდებით შავ ფერს, თუ მუქი ტონალობები გჭირდებათ. გამოიყენეთ ყავისფერი და მუქი ნაცრისფერი, ეს ეხება როგორც ავეჯს, ისე სამზარეულო ნივთების ზედაპირებსა და დეკორაციებს.

სააბაზანო

ინტერიერში შემავალ სააბაზანო ოთახში მსუბუქი და დელიკატური ფერები გამოიყენება. ყველაზე პოპულარულია ქვიშის, სპილოს ძვლის და რძის ფერები. თუ გსურთ თქვენი აბაზანა სხვებისგან განსხვავებული და კაშკაშა იყოს, შეგიძლიათ მუქი და ნათელი პასტელური ფერების გამოყენებაც.

მნიშვნელოვანია აბაზანაში გამოიყენოთ ბუნებრივი მასალა. თუ თქვენი ბიუჯეტი საშუალებას გაძლევთ, უმჯობესია თქვენი აბაზანა გრანიტით ან მარმარილოთი მოაპირკეთოთ. სასურველია აბაზანის განთავსებაც, შერჩევისას ყურადღება მიაქციეთ მის სტილს, და შეუსაბამეთ  ოთახში შემავალ ფერებსა და ფორმებს. გამოიყენეთ კლასიკური ტიპის შემრევები.

როგორც ყველა სააბაზანოში, სარკის განთავსება აქაც მნიშვნელოვანი ფაქტორია, ფრანგული სტილის სააბაზანოებში, არც თუ ისე იშვიათია - იატაკზე დასადგამი სარკეები.

საძინებელი:

ფრანგულ ინტერიერში საძინებელი ყოველთვის ჰარმონიულად გამოიყურება, თუმცა გასაკვირი არაა, ვინაიდან ფრანგული სტილის ატმოსფერო თავისთავად გულისხმობს სინაზეს, რომანტიკულობას და კომფორტს.

საძინებლის ავეჯი სასურველია დაბალი არეკვლადობით და არაპრიალა ზედაპირით გამოირჩეოდეს, სწორედ ამიტომ, საძინებელში საკმაოდ პოპულარულია - ხის ავეჯი.

საძინებელში იატაკის საფარი მრავალფეროვანია, თუმცა უმჯობესია ბუნებრივი მასალების გამოყენება, როგორებიცაა: პარკეტი, ხის იატაკი, ფაიფურის, კერამიკისა და ბუნებრივი ქვის მასალები.

იმპროვიზაციის გამოყენება ნებისმიერ შემთხვევაში მისასალმებელია, დაამატეთ აქსესუარები თქვენს საძინებელში და დაუკავშირეთ ერთმანეთს ელემენტები, რომლებიც ერთმანეთისგან განსხვავდებიან მასალის და სტილის მიხედვით. გამოიყენეთ:

• ბროლისა და ფაიფურის ფიგურები
• მცირე ზომის ვაზები თაიგულებით
• დეკორატიული ბალიშები

მკერავის მანეკენი, ფრანგული საძინებლის ყველაზე პოპულალური და ცნობილი აქსესუარი გახდა.იგი მორთულია მძივებით, ლენტებით, ქუდებით. მანეკენი შესაძლოა იყოს სტანდარტული ტიპის, ან თუნდაც მავთულისგან დამზადებული ჩარჩო. ნებისმიერ შემთხვევაში, ასეთი ტიპის აქსესუარი - ოთახს ბოჰემურ და თანამედროვე იერსახეს შესძენს.