მოდერნიზმი დაიწყო გვიან 19-ე საუკუნეში და მას შემდეგ დიდი პოპულარობით სარგებლობს მთელ მსოფლიოში. ეს  არის მიმდინარეობა, რომელიც მოიცავს პროგრესულ ხელოვნებას , მუსიკას, არქიტექტურას, ლიტარატურას და დიზაინს.

მოდერნიზმი ინტერიერში მდგომარეობდა  ახალ ხედვასა და მიდგომებში. „ფორმა იმეორებს ფუნქციას“ - ეს გახლავთ ერთ-ერთი ყველაზე მნიშვნელოვანი პრინციპი, რომელიც მოდერნისტულ დიზაინს ეხმიანება, ასე რომ, მისი მთავარი არსი ფორმების გამარტივებაში მდგომარეობს.მოდერნისტულ ინტერიერში იშვიათად ან საერთოდ ვერ შეხვდებით ორნამენტებსა და გაფორმებებს, რაც თავის მხრივ, განსაკუთრებულს და გამორჩეულს ხდის მას.

მოდერნიზმი ინტერიერში საკმაოდ უახლოვდება ბუნებას და მისი მთავარი მიზანი ბუნების ჰარმონიის მოპოვებაა. ამიტომ, ამგვარ ინტერიერში ხშირად შეხვდებით დიდი ზომის ფანჯრებს, რათა შიდა ინტერიერს გარესამყაროსთან ახლო კავშირი ჰქონდეს, ასევე მცენარეებსა თუ ბუნების თემატიკის პოსტერებს.

ფორმები და ფერები:

სახლის მოდერნისტულ დიზაინში მოსაწყობად, კედელზე სასურველია ნეიტრალური ფერები გამოიყენოთ. შეარჩიეთ თეთრისა და ნაცრისფერის სხვადასხვა ვარიაციები თქვენი სახლის ინტერიერის მოდერნისტულად მოწყობისას, დამატებით ფერში შეზღუდული არ ხართ, თუმცა უნდა დარწმუნდეთ, რომ ფერები ორგანულად  შეეწყობა ერთმანეთს. ამ ტიპის დიზაინში შემავალი კომპონენტები ხშირად  მარტივ, სუფთა ხაზობრივ პრინციპებზე დაყრდნობითაა აგებული. მოდერნისტულ დიზაინში მძლავრი ჰორიზონტალური და ვერტიკალური ხაზები ეხმიანება ავეჯისა და დეკორაციის დიზაინს.

მოდერნისტული დიზაინი ფოკუსირებულია მინიმალიზმზე, მისი საპირისპირო გახლდათ: გოთიკური, რენესანსული და ვიქტორიანული სტილი, სადაც მძიმე ტექსტურები, ორნამენტები და უამრავი ბნელი ელემენტი შედიოდა. მოდერნიზმმა, მისი პრინციპისა და არსის წყალობით ეს ყველაფერი უარყო და ამასთან, ინტერიერში შემავალ ყველა დეტალს ფუნქცია-მოვალეობა დააკისრა.

მოდერნისტული ინტერიერის მოწყობა შესაბამისი მასალების შერჩევას მოითხოვს. ამგვარ ინტერიერში ხშირად გამოიყენება ხის მასალა, მუხისა და კაკლის მასალის გამოყენება ხშირია მისაღებ ოთახებში, ასევე  გამოიყენება ბაზალტი, კვარცი და კერამიკული ფილა.

მეტალისა და შუშის დეტალებიც საკმაოდ დიდ როლს თამაშობს მოდერნიზმის ინტერიერში ინტეგრაციის დროს.

სამზარეულო

სამზარეულო ოთახის მოწყობა მოდერნისტულ სტილში ერთ-ერთი უმნიშვნელოვანესი ფაქტორია, უახლესი სამზარეულო ტექნიკა მოდერნისტულ სამზარეულოში ერთგვარი კონტრასტია და სხვადასხვა პერიოდის სინთეზს წარმოადგენს, თუმცა მისი მოწყობისას მნიშვნელოვანია არ დაიკარგოს მოდერნიზმის ესთეტიკა და პრაქტიკულობა. ასევე ყურადღება მიაქციეთ სამზარეულო ხელსაწყოებს, დატოვეთ ის რასაც ყოველდღიურად იყენებთ, რათა არ დაიკარგოს მოდერნიზმის სიმარტივის ერთ-ერთი მთავარი არსი - „არაფერი ზედმეტი“

მოდერნისტული სამზარეულოს მოწყობისას მნიშვნელოვანია აქცენტი ხის ავეჯზე გააკეთოთ. ასეთ შემთხვევებში ხის მასალა განსაკუთრებულ სითბოს აძლევს კონკრეტულ ოთახს, იატაკის საფარი მოდერნისტულ სამზარეულოში სხვადასხვაგვარია, შეხვდებით როგორც კერამიკულ ფილას, ისე მუქი ფერის ხის იატაკს.

სააბაზანო

სააბაზანო ოთახში ვრცელდება ყველა ის დეტალი, რასაც ზოგადად მოდერნიზმი მოიცავს, მარტივი გეომეტრიული ფორმები, თეთრი და ნეიტრალური ფერები, როგორც ზოგადი ინტერიერის ისე დეკორაციის წესით. ამ სტილის სააბაზანოში შეგიძლიათ გამოიყენოთ ავეჯი ბუნებრივი ხის, მარმარილოსა და ქვის ზედაპირით.  იატაკის საფარისთვის შეგიძლიათ გამოიყენოთ კერამიკული ფილა.

სააბაზანო ოთახში, ისევე როგორც სხვა დანარჩენში სასურველია ყურადღება მიაქციოთ შემრევის დიზაინს,  გამოიყენეთ კუთხოვანი და მარტივი დიზაინის შემრევები. რაც შეეხება სარკეს, უმჯობესია განათავსოთ დიდი ზომის სააბაზანო სარკე, მოდერნისტული ინტერიერის სააბაზანოებში ხშირია მთელს კედელზე განთავსებული უსაზრმაზარი ზომის სარკეები, ეს მეთოდი სააბაზანო ოთახს ვიზუალურად ორჯერ უფრო აღქმადს და ზომით დიდს წარმოაჩენს.

საძინებელი

მოგეხსენებათ მოდერნიზმის კონცეფცია საკმაოდ გავს მინიმალიზმის არსს, მათ უდიდესი საერთო აქვთ და ეს - „სიმარტივეა“. საძინებელი ოთახის ამ სტილში გადაწყვეტა იდეალური ვარიანტია, ვინაიდან მარტივი და დაუტვირთავი გარემო ადამიანს განტვირთვაში და დასვენებაში ეხმარება.

მოდერნისტული საძინებელი ხის დეტალების სიხშირით გამოირჩევა, ხის ტუმბოებო და მინიმალისტური დიზაინის სანათი ოთახს მეტ ესთეტიკას შემატებს და მოდერნიზმის ატმოსფეროს უკეთესად გაგრძნობინებთ. ასევე საძინებლებში ხშირია ოთახის მცენარეები, რაც უფრო ორგანულსა და ბუნებასთან მონათესავეს ხდის აღნიშნულ ოთახს.