ბაროკო არის მიმდინარეობა, რომელიც XVII საუკუნეში, იტალიაში გამოჩნდა. ბაროკო ხელოვნებაში პერიოდიცაა და სტილიც, რომელიც ამ საუკუნეში დომინირებდა. ამ პერიოდში ადამიანები დაუბრუნდნენ ელეგანტურობას, სიდიადესა და ფუფუნებას. მოგეხსენებათ, ცხოვრების ეს სტილი სახლების ინტერიერშიც გამოჩნდა. ახალი სტილი სირთულეებით, მაღალი თეატრალიზმითა და ემოციურობით გამოირჩეოდა. ბაროკოს სტილის ინტერიერს იყენებდნენ სასახლეებში, ელიტურ სახლებში  და ყველა იმ სივრცეში, სადაც დახვეწილი და მდიდრული გარემოს შექმნა სურდათ.

ბაროკოს სტილის ინტერიერს დღესდღეობითაც მრავალი მიმდევარი ჰყავს. ამ სტილის ინტერიერი მიზნად ისახავს მესაკუთრეთა მაღალი სტატუსისა და სიმდიდრის წარმოჩენას.

ფორმები და ფერები:

პოპულარულ ფერებს, ბაროკოს ინტერიერში, წარმოადგენს თეთრი და ოქროსფერი, თუმცა ასევე გვხვდება ცისფერი, კრემისფერი, ყავისფერი და სპილოს ძვლის ფერი. ამ სტილში ვერ შეხვდებით სწორ, მკვეთრ ხაზებს, ინტერიერის მთლიანი სქემა მომრგვალებულია. ხშირად იყენებენ ყვავილების ორნამენტებს და ოვალისებურ ფორმებს, რომლებიც შერწყმულია რთულ დიზაინში და საბოლოოდ ინტერიერში შემავალი დეტალების სიმრავლეს ქმნის.

ბაროკოს სტილის გამომწვევი, მდიდრული დეკორი ახასიათებს, ინტერიერის ჭერი ხშირად წარმოდგენილია ფერწერული ნამუშევრებითა და დეკორატიული ჩარჩოებით. თანამედროვე სამშენებლო მასალები საშუალებას იძლევა შევქმნათ ბაროკოსეული ჭერის სხვადასხვა ვარიანტები.

ბაროკოს კედლები არ არის ბრტყელი და ერთფეროვანი, კედლის თითოეულ ნაწილს  გარკვეული მნიშვნელობა აქვს. შეგიძლიათ გამოიყენოთ ამავე სტილის ნახატები, სარკეები მოჩუქურთმებული ჩარჩოთი და რაც მთავარია, ბუხარი, თუ  ნამდვილი ბუხრის განთავსება თქვენს ბინაში შეუძლებელია, გამოიყენეთ ელექტრო ბუხარი. ინტერიერში ასევე სასურველია ხალიჩების განთავსებაც.

რაც შეეხება ფანჯრებს, ბაროკოს სტილის ფანჯრები არასტანდარტულია, ეს სტილი, სტანდარტულისგან განსხვავებით, მრავალი მორთულობით სავსე ფანჯრებს ითვალისწინებს. ასევე პოპულარულია ოთახებში ისეთი ქანდაკებების არსებობაც, როგორებიცაა: ადამიანის ფიგურები, მითოლოგიური გმირები და ა.შ.

მასალები:

ოთახებში ავეჯი უნდა შეესაბამებოდეს ამ სტილის ფუფუნებას და სასურველია დამზადებული იყოს ძვირადღირებული, ლამაზი ქსოვილებისგან. მათი ფორმა ბაროკოს სტილის შესაბამისად, მომრგვალებული და რკალისებულია, ამ სტილში ავეჯის ფეხებსაც კი უდიდესი მნიშვნელობა ენიჭება. ძველი დროის ბაროკოში უხვად შეხვდებოდით დეკორაციებში შემავალ ოქროსა და ვერცხლის დეტალებს.

„მდიდრული ხარისხი ყველგან“  - ამ დევიზს ხშირად იყენებენ ბაროკოს ინტერიერში, ყველგან შეხვდებით მაღალი ხარისხის ნაჭრებსა და ტექსტილებს,რისთვისაც ბარხატსა და ატლასის ქსოვილებს იყენებენ.

ბაროკოში შემავალი მასალებიდან პოპულარულია: ხე, ქვა, მარმარილო. ამ სტილში მთავარი პირობა არის ის, რომ მასალები უნდა იყოს ნატურალური. იატაკზე იყენებენ მარმარლოს, ქვას, თანამედროვე ბაროკოს სტილის სახლებში ლამინატსაც ხშირად შევხვდებით. გამოარჩევენ წითელი ხისგან დამზადებულ მაღალი ხარისხის პარკეტს.

განათება

ამ სტილში განათებაც ისეთივე მდიდრული და ელეგანტურია, როგორც სხვა დანარჩენი დეტალები. ბაროკოს სტილის ჭაღებს აქვთ უამრავი გაფორმება და ორნამენტი, რკალისებული დეტალები - ბაროკოსეული განათების ძირითადი მახასიათებელია. ამგვარ ჭაღებზე ძირითადად პოპულარულია სასანთლის ფორმები და სანთლის იმიტაციის მქონე ნათურები.

სამზარეულო

ბაროკოს სამზარეულო კომპლექტები კლასიკური სტილის ავეჯის მსგავსია, თუმცა მას ერთი დეტალი გამოარჩევს - დეკორაციის სიმრავლე, ეს შეიძლება იყოს ჩუქურთმები, სარკეები და ა.შ. ამ სტილში პოპულარულია სამზარეულო კუნძულებიც, რაც ბუნებრივია დიდ ფართობს მოითხოვს.

მიუხედავად იმისა, რომ ეს სტილი საუკუნეების წინ წარმოიშვა, არ ნიშნავს იმას რომ დღესაც არ გამოიყურება თანამედროვედ. ხშირად ის წარსულისა და აწყმოს შერწყმის გამომხატველია. სამზარეულოში ტიპური ფერის კომბინაციას თეთრი და ოქროსფერი ტონალობები წარმოადგენს, გარდა ამისა, ავეჯზე დატანილი ორნამენტები ამ პერიოდის მთავარი მახასიათებელია. რაც შეეხება სამზარეულო განათებას, ოთახის ცენტრში სასურველია მასშტაბური ჭაღის განთავსება,ისეთის, როგორიცაა მაგალითად ბროლის ჭაღი.

სააბაზანო

ბაროკოს სტილიდან გამომდინარე, სააბაზანო ოთახის მოსაწყობად საკმარისი ფართობის ოთახი დაგჭირდებათ, მაგალიღად: 10 კვადრატულ მეტრზე ნაკლები ფართობის ოთახი, ბაროკოს ტიპის სააბაზანო ინტერიერისთვის არადამაკმაყოფილებელია.

გასათვალისწინებელია, რომ სააბაზანო ოთახში სივრცე კარგად უნდა იყოს ორგანიზებული, რათა ოთახში მაქსიმალური თავისუფალი ადგილი დარჩეს. რაც შეეხება გაფორმებას, ტექსტილი უნდა გამოიყენოთ ზომიერად. მიზანშეწონილია, რომ აქ ფუფუნების შემცველი დეტალები მინიმუმადე დაიყვანოთ, რათა ოთახი არ გახდეს ზედმეტად გადატვირთული.

სასურველია, რომ სააბაზანოში გამოყენებული მასალები იყოს ბუნებრივი. რაც შეიძლება ნაკლები იმიტაციით. მაგალითად: არ შეცვალოთ მარმარილო - ხელოვნურით, ამ შემთხვევაში ჯობს აირჩიოთ ალტერნატიული მასალა, როგორიცაა თანამედროვე, პრიალა ზედაპირის ფილები.

ასევე გაითვალისწინეთ პროპორციების დაცვა, ბაროკოს სტილი არ იძლევა ასიმეტრიული ფორმების გამოყენებისა და პროპორციულობის დარღვევის საშუალებას.

საძინებელი

ბაროკოს ეპოქაში, საწოლი, სახლის ერთ-ერთი ყველაზე მნიშვნელოვანი დეტალი გახლდათ, შესაბამისად საძინებელ ოთახს საკმაოდ დიდი ყურადღება ეთმობოდა. ამ კონკრეტულ ოთახს მნიშვნელობა დღესაც არ დაუკარგავს. ბაროკოს სტილის საძინებლის მოწყობისას გაითვალისწინეთ ოთახის მასშტაბი, რათა ბაროკოს პრინციპების დაცვა მარტივად შეძლოთ.

კედლებზე სასურველია გამოიყენოთ ორნამენტებით დატვირთული შპალერი. ასევე ყურადღება მიაქციეთ ფარდებსაც, ფარდა მაღალი ხარისხის ქსოვილით უნდა იყოს შემდგარი, როგორებიცაა მაგალითად: ატლასი და ხავერდი.

როგორც ცნობილია, საწოლის მიმდებარედ ტუმბოების განთავსება ბაროკოს პერიოდიდან იღებს სათავეს. გამოიყენეთ საწოლის შესაფერისი ორნამენტების მქონე ტუმბოები, მათი სილამაზის გამოსაჩენად კი მიმართეთ ბაროკოსეულ მეთოდს - მუქი კედლის დიზაინი საშუალებას მოგცემთ მაქსიმალურად წარმოაჩინოთ საწოლის დიზაინი და ფერი.