გოთიკური სტილი XII საუკუნეში, საფრანგეთში წარმოიშვა და საუკუნეების მანძილზე, დიდი პოპულარობით სარგებლობდა მსოფლიოს მრავალ ქვეყანაში. ძირითადად ის ევროპულ ქვეყნებში გავრცელდა.

გოთიკურმა სტილმა არქიტექტურაში მოგვცა ულამაზესი ნაგებობები და არქიტექტურული ნიმუშები, რომელთა სილამაზე დღემდე აღფრთოვანებას იწვევს. ასეთებია: ნოტრ-დამის  საკათედრო ტაძარი, მილანის კათედრალი და ასობით სხვა ულამაზესი ნაგებობა.

არქიტექტურასთან ერთად, მნიშვნელოვნად განვითარდა გოთიკური ინტერიერის ბინების მოწყობაც, ეს სტილი საცხოვრებელში ყოველთვის ქმნიდა მისტიკისა და მძიმე ემოციურ განცდას. თანამედროვე გოთიკური ინტერიერი რთული კონცეფციითა და უდაოდ ძლიერი ელეგანტურობით გამოირჩევა.

გოთიკური ინტერიერის კონცეფცია აზრობრივად ეწინააღმდეგება უმეტეს ინტერიერის დიზაინს. გამორჩეულად კი, მინიმალიზმსა და მოდერნიზმს, სადაც ძირითადი აქცენტი, ინტერიერის სიმსუბუქესა და ღია ტონალობებს ეთმობა. გოთიკურ ინტერიერში ყველაფერი პირიქითაა - მუქი ფერები ინტერიერში, კუთხოვანი ელემენტები, წვეტოვანი თაღები და რთული შედგენილობის ჭაღები, ეს ყველაფერი ქმნის საბოლოოდ ინტერიერის შესანიშნავ, გოთიკურ  სტილს .

ფორმები და ფერები:

გოთიკური ინტერიერის ხასიათს საუკეთესოდ ახასიათებს სიტყვა „სიდიადე“, ეს ემოცია სწორედ მაშინ მიიღწევა, როცა ინტერიერში ხშირადაა გამოყენებული გოთიკური არქიტექტურისთვის დამახასიათებელი ელემენტები. გაფართოებული ფანჯრები, ნათელი ვიტრაჟები, წაგრძელებული, წვეტოვანი კარები, ფანჯრები და დერეფნები. ასევე თითქმის ნებისმიერ გოთიკურ ინტერიერში შეხვდებით ბუხარს. კედლები აქ ხშირად მხატვრული დატვირთვისაა, გასათვალისწინებელია ისიც, რომ გოთიკურ სტილს შესაბამისი ბინა სჭირდება მაღალი ჭერითა და მასშტაბური ოთახებით, თუმცა პატარა ტიპის ბინაშიც შესაძლებელია გოთიკური ატმოსფეროს შექმნა, იმ შემთხვევაში თუ ფერები და მოწყობის დეტალები სწორად იქნება გადანაწილებული. ინტერიერში გოთური სტილის საფუძვლად სწორი ხაზებია მიჩნეული, ხაზები, რომლებიც სივრცეში ზემოთ მიედინება და ხშირად ერთ წერტილში იკვეთება.

გოთიკური ფერები სტილის შესაბამისია - მუქი და ელეგანტური, ესენია: შავი, ოქროსფერი, ზურმუხტისფერი, ლალისფერი, ყავისფერი, მუქი მწვანე და მუქი მეწამული ტონალობები.

მასალები ინტერიერში:

თანამედროვე გოთიკური ინტერიერის შექმნისას სასურველია გამოიყენოთ შპალერი - ორნამენტებითა და ჩუქურთმებიანი დიზაინით. ოთახის მოწყობისას ძირითადად გამოიყენება ბუნებრივი მასალები, მაგალითად: მეტალის, რკინის, ხისა და ქვის დეტალები. ავეჯი ძირითადად ხისგანაა დამზადებული, ხოლო ქსოვილები კი, ხშირად ტყავის, ხავერდისა და ატლასის მატერიებია.

ინტერიერში ფანჯრებს ძირითადად ამშვენებენ მაღალი ხარისხის ქსოვილისაგან შემდგარი - სქელი და მძიმე ფარდები. ამ ტიპის ფარდები, გოთიკური ატმოსფეროს შექმნაში უდიდეს როლს თამაშობს. ასევე, ხშირად გამოიყენება ხისა და ლითონის დეკორატიული ფიგურები და ჩარჩოები. აქსესუარებისთვის კი იყენებენ მინის, ხის, ლითონისა და კერამიკის ნაწარმს, მაგალითად: კერამიკული თეფშები, ლითონის შანდლები, სანათები და ა.შ.

რაც შეეხება იატაკის საფარს, გოთიკური ინტერიერის მოწყობისას საკმაოდ პოპულარული გადაწყვეტილებაა პარკეტის იატაკი, თანამედროვე ვარიანტებიდან შესაძლებელია მუქი ფერის ლამინატის გამოყენებაც.

სამზარეულო

გოთიკური ინტერიერის სამზარეულო გამორჩეულ ხასიათს ატარებს, აქ ვერ შეხვდებით პლასტიკატისა და პრიალა ზედაპირის შემცველ

მასალებს, სასურველია სამზარეულოს ავეჯი ხის მასალისგან იყოს დამზადებული, უამრავი სათავსო უჯრებითა და ძველებური დიზაინით. თანამედროვე გოთიკურ სამზარეულოებში ხშირად შეხვდებით ჩაშენებულ ტექნიკას, ეს იმიტომ, რომ თანამედროვე ტექნიკა მარტივად შეერწყას - ანტიკვარულ, დეტალებით დატვირთულ სამზარეულო ავეჯს.

სამზარეულოში შესაძლებელია გამოიყენოთ ქვის, მარმარილოსა და ხის დეტალები და ზედაპირები. იატაკის საფარი შესაძლოა იყოს ქვისა ან კერამიკის ზედაპირის.

რაც შეეხება სამზარეულო განათებას, აქ, მსგავსად სხვა ოთახებისა შეგიძლიათ გამოიყენოთ მასიური ლითონის ჭაღი, რომელიც, ძირითადად ოთახის ცენტრში თავსდება და დახუნძლულია ორნამენტებითა და სანთლის იმიტირებული ნათურებით.

საძინებელი

მუქი და მკაცრი ფორმების მიუხედავად, გოთური სტილის საძინებელ ოთახებს თანმდევი სიმსუბუქე დაჰყვებათ. ამ ტიპის საძინებლებში ხშირად შეხვდებით მასშტაბური ზომის საწოლს, რომელიც მისი ორნამენტებით, ძირითადად ხის ან მეტალის დეტალებით გამოირჩევა. იმისათვის, რომ საწოლი უფრო მდიდრულად და ელეგანტურად გამოიყურებოდეს, შეგიძლიათ გამოიყენოთ ძვირფასი ქსოვილებიც.

საწოლი და ფარდები შესაძლოა იყოს აბრეშუმისა და ატლასის ქსოვილების სახით. საძინებელში ხშირად იყენებენ ისეთ ხის მასალებს, როგორებიცაა: ფიჭვი, მუხა, კაკალი ან კედარი, რა თქმა უნდა მოჩუქურთმებული ელემენტებით და გაფორმებებით.

საძინებელი ოთახების მოწყობისას, მნიშვნელოვანია გაითვალისწინოთ ოთახში ბუნებრივი განათების არსებობა, ამისთვის გოთიკურ სტილში დიდი ზომის ფანჯრებს იყენებენ.

სააბაზანო

მიუხედავად იმისა, რომ შავი ფერი გოთიკურ ინტერიერში ძალიან დომინანტურია, სააბაზანო ოთახში შესაძლოა შავი ტონალობა არ იყოს ინტერიერის მთავარი ნაწილი. შავი ფერი შესაძლია მუქ მეწამულმა შეცვალოს და ოთახიც უფრო ელეგანტური გახდეს. თანამედროვე გოთიკური აბაზანები ძირითადად უახლესი მასალებითაა წარმოდგენილი, თუმცა, შესაბამისი განათების, ფერებისა და აქსესუარების წყალობით, ისინი არ კარგავენ გოთიკურ ხიბლსა და ემოციას.

სააბაზანო ოთახში სარკეს უდიდესი მნიშვნელობა ენიჭება, გოთიკურ სტილის სააბაზანოში მისი ზომა იზრდება და შესაბამისად, შედეგად ვიღებთ მასშტაბური ზომის სარკეს, რომელიც ფუნქციური და დეკორაციული დატვირთვის გარდა, ოთახის ვიზუალური გადიდების საქმიანობასაც ითავსებს. გოთიკურ ინტერიერში სარკეებს ყოველთვის მოჩუქურთმებული და გაფორმებული ჩარჩოებით შეხვდებით.

იატაკის საფარი თანამედროვე გოთიკურ სააბაზანოებში კერამიკული ფილის სახითაა წარმოდგენილი, ოთახის ცენტრში კი ძირითადად სტანდარტული ტიპის აბაზანაა განთავსებული.