dagvireke
ცხელი ხაზი: 0322 000 800
ან შეავსეთ ფორმა და ჩვენ დაგირეკავთ

close
to top
pinterest facebook email
ბლოგი DIY

22/06/2020

როგორ შევქმნათ კრეატიული ლარნაკი ჩვენივე ხელებით

Goga Bibiluri
Goga Bibiluri
როგორ შევქმნათ კრეატიული ლარნაკი ჩვენივე ხელებით

თუ ფიქრობთ, რომ თქვენი საცხოვრებელი სახლი ახალ გაფორმებას ან ნივთს საჭიროებს, მაშინ, ეს ბლოგი სწორედ თქვენთვისაა.

ხშირად ადამიანები ფიქრობენ, რომ სახლის გაფორმებისთვის საჭირო ნივთების ყიდვა მხოლოდ და მხოლოდ მაღაზიებშია შესაძლებელი. რა თქმა უნდა არსებობს ადგილები, სადაც სახლის ინტერიერისა და ექსტერიერისთვის ულამაზესი ნივთების შეძენაა შესაძლებელი. მაგრამ არ დაგავიწყდეთ, რომ რაიმე ახლისა და ღირებული ნივთის შესაქმნელად, ხშირად მინიმალური მასალები, ნულოვანი ხარჯი და საკმარისი დოზის კრეატივია საჭირო.

მაშ ასე, დღევანდელ ბლოგში გასწავლით, თუ როგორ შექმნათ ყველასგან გამორჩეული და ულამაზესი ლარნაკი თქვენივე ხელებით...

პირველ რიგში, დაიწყეთ საჭირო მასალების მომარაგება:

  • სტანდარტული, ვოლფრამის ტიპის ნათურა (შესაძლებელია გამოიყენოთ ნათურა შიდა დაზიანებით, თუმცა აუცილებელია, რომ შუშის გარე ზედაპირი დაუზიანებელი იყოს)
  • მავთული (რეკომენდირებულია მსგავსი მასალის ტანსაცმლის საკიდი)
  • პატარა ზომის ყვავილი
  • მკვნეტარა
  • ბრტყელტუჩა
  • სახრახნისი
  • საზომი რულეტი ან სახაზავი
  • მარკერი


  1. პირველ რიგში, მოიმარჯვეთ ზემოთ აღნიშნული, სტანდარტული ვოლფრამის ნათურა


   2. ბრტყელტუჩას საშუალებით ნათურას მოაშორეთ ხრახნის ქვედა, მუქი ფერის ნაწილი.                                                                                                                                                                                                            *უსაფრთხოებისთვის გამოიყენეთ დამცავი ხელთათმანი



3.ვინაიდან ნათურის ქვედა, საიზოლაციო კორპუსი მყარადაა დამაგრებული, მის მოსაშორებლად უმჯობესია დაიხმაროთ წვრილი ზომის სახრახნისი.



4.  საიზოლაციო ნაწილის მოშორების შემდეგ, ფრთხილად დაანაწევრეთ ნათურის შიდა ნაწილები. დანაწევრებული მასალები კი ფრთხილად გამოაძვრინეთ ნათურის ქვედა ნახვრეტიდან.



5.ნაწილებისგან გასუფთავების შემდეგ, ფრთხილად გაწმინდეთ და გააპრიალეთ ნათურის შიდა ზედაპირი.



6.  მოიმარჯვეთ მავთულის ტიპის ტანსაცმლის საკიდი



7. მკვნეტარას საშუალებით, საკიდს მოაჭერით ზედა, კაუჭისებრი ნაწილი. ასეთი ხელსაწყოს არქონის შემთხვევაში, შეგიძლიათ გამოიყენოთ ბრტყელტუჩაზე არსებული მავთულის საჭრელი.



8.  გაასწორეთ მავთული, გასწორებული მავთული გადაზომეთ და მოჭერით 60 სმ სიგრძის მონაკვეთი.



9.  მარკერის გამოყენებით, მავთულზე მონიშნეთ 4 წერტილი 12 სმ-იანი დაშორებებით, ისე, რომ მასზე გამოიყოს 5 თანაბარი მონაკვეთი.



10. პირველ ორ წერტილში მავთული გადაკეცეთ სიბრტყეზე. ისე, რომ სამკუთხედის ფიგურა მიიღოთ



11.  რიგით მესამე წერტილზე, მავთული მოხარეთ მართობულად. ეცადეთ მიიღოთ 90 გრადუსიანი კუთხე. ამ ეტაპზე თქვენი მავთულისგან საყრდენის ფორმა მიიღეთ.



12. ამჯერად, მავთულის ბოლო მონაკვეთი წრიულად მოღუნეთ. სასურველია აღნიშნული მრუდი ნათურის ქვედა ლითონის ზომის იყოს.



13.  გამზადებული ნათურა მოათავსეთ მავთულის ნაკეთობაზე, შემდეგ კი ბრტყელტუჩას საშუალებით მჭიდროდ მოუჭირეთ მას.



14. დაამატეთ წყალი და მოათავსეთ ყვავილები.


კონკრეტული პროექტის ბოლო და უმნიშვნელოვანესი ეტაპი, ამ ნივთის სწორ და კარგად გამოსაჩენ ადგილზე განთავსებაა.

ესეც ასე, მარტივი და სასიამოვნო პროცესის შემდეგ მივიღეთ ძალიან კრეატიული და გამორჩეული ყვავილების ლარნაკი, რომლის განთავსებაც ნებისმიერ ოთახშია შესაძლებელი.