პოპ არტი გახლდათ ხელოვნების მიმდინარეობა, რომელიც 1950-იან წლებში ბრიტანეთში, შემდგომ კი აშშ-ში გახდა პოპულარული.ამ მიმდინარეობამ შეცვალა ხელოვნების ტრადიცია ისეთი პოპულარული თემებით, რომლებიც მოიცავს პოპულარულ კულტურას, რეკლამას, ახალ ამბებს და ა.შ.  მისი კონცეფციის გაგება მარტივია, პოპ არტი ნიშნავს პოპულარულ ხელოვნებას  - ყველასთვის ცნობილსა და გასაგებს. ხელოვანების თქმით, რაც უფრო მეტად დაემსგავსებოდა ყოველდღიური მოხმარების საგნები მხატვრულ ნამუშევრებს, მით უფრო გასაგები და აღქმადი გახდებოდა ხელოვნება ყველასთვის.

 პოპ არტი აქტიურად გამოიყენებოდა სახლის ინტერიერშიც, ინტერიერის ეს სტილი დღემდე აქტუალურია ადამიანების განსაზღვრულ კატეგორიაში, სტანდარტულად, პოპ არტის მოყვარულები ახალგაზრდები არიან, ვინაიდან ამ სტილის მთავარი არსი თავისუფლება და სილაღეა. გარდა საცხოვრებელი სახლებისა, ინტერიერის ამ მიმდინარეობას ხშირად შეხვდებით კაფე-ბარებში, კინოთეატრებში და მსგავს დაწესებულებებში.

ფორმები და ფერები

ინტერიერის დიზაინში პოპ არტი არაჩვეულებრივად გამოიყურება, კონტრასტული და გამომხატველი ფერები, დინამიური პოსტერები და ნათელი ტონალობები, ფერადი და განმეორებითი ელემენტები, პოპ არტის ინტერიერში შესაძლებელია ზომიერი ასიმეტრიაც, რაც მისი დიზაინის თავისუფლებაზე მეტყველებს.

მოგეხსენებათ, პოპ არტის მთავარი კონცეფცია თავისუფლებაზეა დაფუძნებული, სწორედ ამიტომ, მასში არ არსებობს შეზღუდული ფორმები  და მითითებები, თუმცა გასათვალისწინებელია ის  აუცილებელი ფაქტორები, რაც კონკრეტული სტილის შექმნას დაეხმარება და უკეთ წარმოაჩენს.

დიზაინერების თქმით, პოპ არტის სტილში ოთახის შექმნისას შეგიძლიათ გამოიყენოთ 1 ძირითადი და 2 დამატებითი ფერი, სასურველია, რომ ერთ-ერთი ფერი მკვეთრ ტონალობაში იყოს და სხვა დანარჩენებთან შედარებით კონტრასტულად გამოიყურებოდეს. ძირითადი ფერებს თეთრი და შავი წარმოადგენს, დამატებით ფერებად კი შეგიძლიათ წითელი,ყვითელი, ლურჯი და მწვანეც მოიაზროთ.  ჭერი ასეთ ოთახებში ძირითადად თეთრ ტონალობებშია გადაწყვეტილი.

ერთ-ერთ კედელს კი სასურველია დაემატოს დეკორაციული გაფორმებები : პოსტერები, ვინილის ფირფიტები, ნეონური განათება, ან ფოტო-ფრაგმენტები კომიქსებიდან, რაც ოთახს უფრო ცოცხალსა და მხიარულს გახდის.

მასალები

პოპ არტის სტილის ინტერიერში გამოიყენება როგორც სინთეთიკური, ისე ბუნებრივი და ნატურალური მასალებიც. ძირითადად შეხვდებით მეტალს, პლასტმასს, პოლიესტერს, აკრილს, სარკესა და ტყავის დეტალებს. ამრეკლი ზედაპირის ავეჯის გამოყენება, ოთახს პოპ არტისკენ 1 ნაბიჯით დაახლოვებს.

გადაჭრით არ შეგვიძლია ვთქვათ იატაკის საფარის შესახებ, ვინაიდან პოპ არტის სტილის ინტერიერში მთავარი დატვირთვა კედლებზე და ავეჯზეა, ასე რომ,  შესაძლოა იყოს როგორც ლამინატი, ისე ხის,  ან თუნდაც კერამიკული ფილის იატაკის საფარი. იატაკის მნიშვნელოვანი ნაწილია ხალიჩა, რასაც პოპ არტში ხშირად შევხვდებით, ძირითადად ფიგურებითა და გეომეტრიული ნიმუშებით გაჯერებულს.

განათება

რაც შეეხება განათებას, ინტერიერის ამ სტილში კარგი განათება აუცილებელია, სასურველია ეს იყოს ბუნებრივი შუქი, რასაც დიდი ფანჯრები განაპირობებს, თუმცა ამის არ არსებობს შემთხვევაში სასურველია უარი თქვათ სტანდარტულ ფარდებზე და გამოიყენოთ ფარდა-ჟალუზი, ვინაიდან ის უფრო მეტად ეხმარება ბუნებრივი შუქის შემოსვლას ოთახში.

გარდა ბუნებრივისა, მნიშვნელოვანია ხელოვნური განათების დამონტაჟებაც, პოპულარულია ნეონის შუქები და ჭერის წერტილოვანი განათება, რაც განსხვავებულ ეფექტს ქმნის, ავეჯის არეკვლად ზედაპირზე მოხვედრისას.

სამზარეულო

სამზარეულოს პოპ არტის სტილში მოწყობისას, მსგავსად სხვა ოთახებისა, არ არსებობს რაიმე დადგენილი წესი ან შეზღუდვა, თუმცა არსებობს რეკომენდაციები რის მიხედვითაც მარტივი გახდება აღნიშნული მიზანის მიღწევა. ესენია:

• გამოიყენეთ ამრეკლი ზედაპირის სამზარეულო ავეჯი
• განსხვავებული და არასტანდარტული დიზაინის სავარძლები, გეომეტრიული ფიგურების დიზაინით.
• ფართო მასშტაბის პოსტერი კედელზე
• ფერადი მაგიდა და სკამები

იატაკის საფარად შეგიძლიათ გამოიყენოთ კერამიკული ფილა, ლამინატი ან ლინოლეუმი. კონკრეტული სტილის სამზარეულოებში ხშირად შეხვდებით იატაკის ფილების თეთრს ან შავ ტონალობაში გადაწყვეტას.

 გარდა ამისა, თანამედროვე სამზარეულო ტექნიკა ჰარმონიულად ურთიერთქმედებს პოპ არტის სტილის ინტერიერთან.

სააბაზანო

სააბაზანო ოთახის მოწყობისას შეგიძლიათ გამოიყენოთ სხვა შემთხვევებში გამოყენებული მასალაც, თუმცა უპირატესობა მიანიჭეთ შემდეგ დეტალებს:

 

• წყალ და ტენიანობის ამტანი მასალები
• პრიალა ზედაპირის მასალები/ავეჯი
• ნათელი ფერის მასალები
• სწორი ზედაპირის მასალები და ავეჯი

კედლები შესაძლოა დაფარული იყოს აკრილის ან ლატექსის საღებავით, შესაძლებელია ფილების გამოყენება. პოპ არტისეულ სამზარეულოში ვერ შეხვდებით მარმარილოსა ან ბუნებრივი ქვის დეტალებს, რადგან ისინი ინტერიერში ფუფუნებისა და მდიდრული იერსახის შესაქმნელად გამოიყენება, რასაც მკაცრად ეწინააღდმეგება პოპ არტის მთავარი არსი.

სააბაზანოს მოსაწყობად შესაძლებელია გამოიყენოთ კრეატიული იდეები და შექმნათ განსაკუთრებული ატმოსფერო. გამოიყენეთ დიდი ზომის პოპ არტ პოსტერები, მხიარული, ნათელი ფერები და დეკორაციები. გახსოვდეთ! თქვენ სრული თავისუფლება გაქვთ...

საძინებელი

პოპ არტის კონცეფცია თავისუფლებაზეა დაფუძნებული... სწორედ ეს გამოარჩევს მას სხვა მიმდინარეობებისგან. რაც შეეხება საძინებელს, ამ შემთხვევაში არჩევანი თქვენზეა, შეგიძლიათ გამოიყენოთ ფერადი ავეჯი ან აქსესუარები, ან აირჩიოთ სტანდარტული სტილის ოთახი რასაც დაამატებთ პოპ არტ განწყობას ჩვენთვის კარგად ნაცნობი პოსტერებითა და აქსესუარებით.

პოპ არტ ინტერიერის დიზაინის შექმნის მთავარი ფაქტორი - იყავით თამამი და გაბედული! ისარგებლეთ ნათელი და განსხვავებული ფერებით, გამოიყენეთ ინტერიერი თქვენი ხასიათისა და დადებითი განწყობის გადმოსაცემად.

საძინებლებში ასევე საკმაოდ პოპულარულია კედლის მხატვრობა, აირჩიეთ სასურველი კედელი და შეუდექით მის გაფორმებას,  ნახატის სტილი რა თქმა უნდა ცნობილია - პოპ არტი!