არტ დეკო სტილი ინტერიერში საუკეთესოა მათთვის, ვისაც მოსწონს მომხივლელობა და ელეგანტურობა. ეს ყველაფერი მისი ძვირადღირებული დეკორაციებით, მასალებითა და ინტერიერში შემავალი მსუყე დიზაინის კომპონენტებით ხასიათდება.

არტ დეკო პოპულარული ევროპასა და ამერიკაში 20-ე საუკუნის 20-იან წლებში გახდა, ის აქტუალური იყო როგორც ინტერიერში, ისე მოდაში, არქიტექტურასა და ავტომობილების დიზაინში. ეს სტილი უფრო ეკლექტურადაა მიჩნეული და მასზე გავლენას მრავალ სხვადასხვა წყაროს მიაწერენ.

არტ დეკოსთვის დამახასიათებელია გეომეტრიული და კუთხოვანი ფორმები, ეგზოტიკური მასალები. ასევე, არტ დეკოს დიზაინს ხაზოვანი გაფორმებები ახასიათებს. ვინაიდან,  ინტერიერის მთავარ სახედ, სიძლიერე და სითამამეა მიჩნეული.

მასალები ინტერიერში:
 

არტ დეკოსთვის  მკაცრადაა განსაზღვრული ინტერიერში შემავალი მასალები, ესენი შესაძლოა იყოს: რკინის ზედაპირის მასალა, სარკეები, ქრომი, მინა, ლაქი, ბუნებრივი ხე და ეგზოტიკური ტყავიც კი. ასევე ხშირად გამოიყენება ისეთი ძვირადღირებული მასალები, როგორიცაა: მარმარილო და განსაკუთრებული, იშვიათი ხეები, მათ შორის - აბანოზის ტიპის შავი ხე.

ფერები

არტ დეკოს ინტერიერში ფერები კონტრასტულობით გამოირჩევა, ღია და მუქი ტონალობების წითელი, მწვანე, ლურჯი და ყვითელი ფერები, კარგად ერწყმის არტ დეკოსთვის დამახასიათებელ ძირითად ფერებს: ვერცხლისფერს,შავს და ქრომს. შედარებით რბილი ატმოსფეროსთვის შესაძლებელია კრემისფერის გამოყენება, ეს ფერი პრიალა ხესა და ლაქიან ავეჯს ჰარმონიულად  ერწყმის.

ავეჯი:

თუ სახლის ამ სტილში მოწყობას გადაწყვეტთ, შეარჩიეთ მკაცრი და ხაზოვანი ფორმების ავეჯი, სასურველია ბუნებრივი ხისგან დამზადებული ავეჯი. ასევე, არტ დეკოს ინტერიერში ხშირად შეხვდებით ქრომირებულ და სარკისებულ გაფორმებებს ავეჯზე.

გარდა ფორმისა, გასათვალისწინებელია ავეჯის ზომაც, ამ ტიპის ინტერიერში ავეჯი მასშტაბური ზომისაა. სავარძლების, დივნებისა და სკამების შესამჩნევი სიდიდე, ამ პერიოდისთვის დამახასიათებელია და უდიდეს როლს თამაშობს ინტერიერის ფორმირების პროცესში.

იატაკი

ამ ტიპის ინტერიერში იატაკის საფარი საკმაოდ აბსტრაქტული და გამორჩეულია. თეთრი და შავი ფერის ფილები საკმაოდ პოპულარულია არტ დეკოს სტილის ბინაში, ასევე ხშირად შეხვდებით პრიალა  პარკეტისა და ბუნებრივი ხის იატაკის საფარს.

თუ საუბარი გვაქვს იატაკზე, აუცილებელია შევეხოთ ხალიჩასაც. ხალიჩა არტ დეკოში საკმაოდ პოპულარულია, თუმცა აქაც არ უნდა დაივიწყოთ კონკრეტული ინტერიერის ხასიათი და შერჩევისას აქცენტი გეომეტრიული ფიგურებით დატვირთულ, დიდი ზომის ხალიჩაზე გააკეთოთ.

განათება

XX საუკუნის არტ დეკოში პოპულარობით სარგებლობდა მინისა და ქრომისგან დამზადებული სანათები. თეთრი და ფერადი ტიპის შუშაც საკმაოდ გავრცელებული იყო. ამ ტიპის სანათების შეძენა დღესდღეობითაც შეგიძლიათ, ვინაიდან მსგავსი სანათების განახლებული დიზაინი და თანამედროვე ინტერპრეტაციები ბაზარზე მრავლადაა წარმოდგენილი.

სამზარეულო

სამზარეულოს ამ სტილში მოწყობისას არ უნდა დაივიწყოთ არტ დეკოს მთავარი არსი -  ხაზოვანი და გეომეტრიული ფორმები. არტ დეკოს მიერ ინსპირირებული სამზარეულო ერთროულად ითავსებს ფუნქციურობას და ელეგანტურას. ეს სტილი განსაკუთრებით უხდება სამზარეულო და სასადილო ზონას.

სამზარეულო ავეჯის შერჩევის დროს სასურველია შეარჩიოთ პრიალა ტექსტილის ავეჯი, გამოკვეთილი და ხაზოვანი ფორმებით. ასევე არტ დეკოს სტილის სამზარეულოში საკმაოდ მნიშვნელოვანია ჩაშენებული ტექნიკის არსებობა.

სააბაზანო

თავდაპირველად, როდესაც სახლებში არტ დეკოს სტილის ინტერიერი გამოჩნდა, ძირითადად შეხვდებოდით მარმარილოთი მოწყობილ სააბაზანო ოთახებს, დღესდღეობით კი უფრო მეტადაა წარმოდგენილი ფილები. უმჯობესია შეარჩიოთ ამრეკლი ზედაპირის მქონე სააბაზანოს ფილები, ასევე, მათი საშუალებით სხვადასხვა გეომეტრიული ფიგურების შექმნა სააბაზანოს საკმაოდ მიმზიდველს გახდის. არტ დეკოს სტილის სააბაზანოებში გავრცელებულია ძველებური ტიპის აბაზანები, რაც დამატებით, გასაოცარ ეფექტს მატებს ამ ტიპის ოთახის ინტერიერს.

საძინებელი

არტ დეკოს სტილის საძინებლები მუქი ფერებით გამოირჩევა, მისი მოწყობის დროს ხშირად იყენებენ მუქი შეფერილობის ხისა და ტყავის დეტალებით შექმნილ ავეჯს. მსგავსად  ამ სტილის სხვა ოთახებისა, სარკე საძინებელ ოთახშიც ხშირად გამოიყენება. ის, თავის მხრივ ოთახს ვიზუალურად უფრო დიდ, მბზინავ და მომხიბვლელს ხდის, სარკის ფორმები კი, ყოველთვის პირდაპირ იმეორებს არტ დეკოს სტილს და ხასიათს.