ელეგანტური, მდიდრული და კომფორტული - ეს გახლავთ ანტიკური ინტერიერის სტილი. მისი ისტორია ძველ საბერძნეთსა და რომში იწყება, ბერძნები იყვნენ პირველები, ვინც შეიმუშავა ინტერიერის კონცეფცია სხვადასხვა დანიშნულების ოთახებისთვის, რომაელებმა კი განაგრძეს ეს საქმე და თავიანთი სახლები, კიდევ უფრო ფართო და მდიდრული გახადეს. საბოლოოდ, ადამიანებმა დაიწყეს ფიქრი და ნაბიჯების გადადგმა, იმისთვის, რომ საცხოვრებელში სულიერი სიმშვიდე და მაღალი განწყობა მოეპოვებინათ. სწორედ ამიტომაა განთქმული ანტიკური ინტერიერი - მისი განუმეორებელი და გულწრფელი ატმოსფეროთი.

ამ სტილის ისტორია ჯერ კიდევ ჩვენ წელთაღრიცხვამდე იწყება. ამ პერიოდში, ძველი ბერძნები დიდი ყურადღებით აფორმებდნენ სახლებს და დიდ მნიშვნელობას ანიჭებდნენ საცხოვრებელში შემავალი ელემენტების, ავეჯისა და დეკორაციების განთავსების დეტალებს.

ინტერიერის ანტიკურ სტილში შექმნამდე, აუცილებელია გაითვალისწინოთ ის ფაქტი, რომ ეს სტილი აღსანიშნავია მისი მონუმენტურობითა და მასშტაბური გაფორმებებით, ამიტომ, ამ სტილისთვის სასურველია ფართო და მაღალი ჭერის მქონე სახლი, ჭერის გარდა, ასევე მნიშვნელოვანია ოთახების სიდიდე, რათა ჩაფიქრებული დიზაინი სისრულეში მოვიდეს და თქვენი იმედები გაამართლოს.

ფორმები და ფერები:

ანტიკურ სტილს უყვარს პომპეზურობა და სიდიადე, აქ ხშირად შეხვდებით უზარმაზარ ფანჯრებსა და სივრცულ ზონებს. ხშირია ამ სტილისთვის დამახასიათებელი თაღები და კოლონები. ასევე - ბიუსტებიცა და ქანდაკებებიც -  ქალღმერთებისა და ღირსშესანიშნავი ადამიანების გამოსახულებებით.

ინტერიერს ყოველთვის ამშვენებდა ფერწერული ნიმუშები. იატაკის ტიპი კი, მოზაიკური გახლდათ, რაც მოგვიანებით ხალიჩებმა დაფარა. ამ სტილში დიდი ყურადღება ექცევა გეომეტრიულ ფიგურებს და მათ გამოყენებას სახლის ინტერიერში. ხშირად შეხვდებით მართკუთხა ფორმის დარბაზებს, ტრაპეციულ ავეჯსა და ა.შ. ანტიკური სტილის მთელი ინტერიერი მარტივი და დახვეწილია.

რაც შეეხება ავეჯს, ამ სტილს განსაკუთრებით უხდება ხის ავეჯი, კონკრეტულ დიზაინში ავეჯის ფეხები ჩუქურთმებითა და გაფორმებებით გამოირჩევა, უფრო მეტად კი გავრცელებულია ავეჯის ფეხების - ცხოველების თათებსა და კლანჭებზე მიმსგავსება. ხშირად შეხვდებით სარკეებსა და ფერწერულ ნიმუშებს, რომლებიც, რა თქმა უნდა ლამაზ, ჩუქურთმებიან ჩარჩოებშია მოქცეული.

ანტიკურ ინტერიერში ფერების მრავალი გადანაწილება არსებობს, თუმცა, გამოარჩევენ ძირითად ფერებს, რომლებსაც უმეტესად შევხვდებით, ესენია: ღია ყავისფერი, კრემისფერი, შავი, მეწამული, სპილოს ძვლისა და ოქროსფერი ტონალობები

მასალები ინტერიერში:

მოგეხსენებათ ანტიკური სტილი თაღებისა და კოლონების სიმრავლით ხასიათდება, ეს შეიძლება იყოს როგორც ფუნქციური, ისე დეკორატიული ხასიათის. ანტიკური ინტერიერი ძველად ბუნებრივი მასალების - ქვის, თიხის, სპილოს ძვლის,მარმარილოსა და ხის მასალის, გამოყენებას ითვალისწინებდა, დღესდღეისობით, ბუნებრივი მასალებით სახლის მოწყობა დიდ თანხებთანაა დაკავშირებული. სწორედ ამიტომ, ანტიკური ინტერიერის დეკორაციისთვის იყენებენ თანამედროვე, ხელმისაწვომ მასალებს, მაგალითად: თაბაშირს ან თაბაშირ-მუყაოს.

იატაკს, ანტიკური სტილის ინტერიერში, ძირითადად მოზაიკა წარმოადგენდა, თუმცა საუკუნეების შემდეგ გაჩნდა ალტერნატიული მასალები და იატაკის საფარის ტიპები, რომელიც ულამაზეს ინტერიერს უზრუნველყოფს და ამასთან, ნებისმიერი სტილის, ხარისხისა თუ სპეციფიკისაა ხელმისაწვდომი, ესენია: ლამინატი, კერამიკული ფილა, ლინოლეუმი, პარკეტი და ა.შ.

ამ სტილის ინტერიერში მცენარეებსაც ხშირად შეხვდებით, ნამდვილი მცენარეების გარდა, ორნამენტებში იყენებენ- აკანთოს, ლოტუსისა და პალმის ფურცლის დეტალებსა და ილუსტრაციებს.

ანტიკური ხასიათის ოთახის შესაქმნელად, მცირე დეტალებსაც დიდი მნიშვნელობა ენიჭება. გამოიყენეთ დეკორატიული ვაზები, ნახატები და სარკეები, რომლის ჩარჩოებიც გაფორმებული იქნება ამ სტილისთვის დამახასიათებელი ორნამენტებით.

რაც შეეხება განათებას, ანტიკურ ინტერიერში გამოიყენება დიდი ზომის, ორნამენტებით მდიდარი ჭაღები. მცირე განათებისთვის კი, სასურველია გამოიყენოთ ჩირაღდნის ფორმის სანათები, რაც ინტერიერს სიძველეს შემატებს და უფრო კლასიკურსაც გახდის. ამ ტიპის განათებისთვის, იდეალური გამოსავალია - ედისონის ნათურა, რომელიც, მისი სპეციფიკური ნათების წყალობით, უფრო დამაჯერებელ იმიტაციას შექმნის.

სამზარეულო

სამზარეულო - ანტიკურ ინტერიერში მისივე მითითებების მიხედვით უნდა მოაწყოთ, სასურველია, რომ ამ ტიპის ოთახში ერთი ან მეტი თაბაშირის ქანდაკება იყოს განთავსებული. მოგეხსენებათ, უწინ სამზარეულოს ავეჯი ხის მასალით იწყობოდა, დღესდღეისობით შესაძლებელია როგორც ხის, ისე თანამედროვე MDF მასალის გამოყენება.

მნიშვნელოვანია, რომ სამზარეულოს ავეჯის ფერები დიდად არ განსხვავდებოდეს ოთახის კედლის ფერებისგან. მიზანშეწონილია არჩევანი მსუბუქ ფერებზე გააკეთოთ. ინტერიერის დეკორაციისთვის გამოიყენეთ: თეთრი, კრემისფერი, ღია ოქროსფერი და ვარდისფერი ტონალობები.

იატაკის საფარისთვის საუკეთესო გადაწყვეტილებაა - კერამიკული ფილა, საბედნიეროდ, დღესდღეისობით უამრავი სტილისა და დიზაინის ფილა არსებობს, რაც ხელს უწყობს სასურველი ინტერიერის სტილისა და იატაკის დიზაინის თანხვედრას.

სააბაზანო

ანტიკური დიზაინი, ნებისმიერ ოთახს შესძენს კლასიკურ და მომხიბვლელ ატმოსფეროს. ანტიკური დიზაინის შექმნისას ოთახის ზომას დიდი მნიშვნელობა ენიჭება, პატარა სააბაზანო ოთახში კლასიკური მასშტაბურობის აღქმა იკარგება, თუ ოთახი საშუალო ან დიდი ფართობისაა, მაშინ არ არსებობს ბარიერი და დანარჩენი თქვენს ფანტაზიაზე და ბიუჯეტზეა დამოკიდებული.

ამ ტიპის სააბაზანოში საკმაოდ პოპულარულია კერამიკული ფილა - ანტიკური და კლასიკური დიზაინით, ფილებს იყენებენ როგორც იატაკზე, ასევე კედლებზეც. იატაკის ფილები ხშირად ქვის იმიტაციას ახდენს.

რეკომენდირებულია კლასიკური ფორმის ელეგანტური აბაზანის განთავსებაც, გარდა აბაზანისა, სანტექნიკის კომპონენტებსაც ყურადღება უნდა მივაქციოთ. არჩევანი შეაჩერეთ ოქროს, ვერცხლის, ბრინჯაოს ფერის კლასიკურ მოდელებზე, მცირე ზომის აქსესუარები კი შესაძლოა ქვის ან კერამიკისგან იყოს დამზადებული.

ნუ დაივიწყებთ სარკის ჩარჩოების განთავსებას, გამოიყენეთ ამ სტილისთვის დამახასიათებელი - კლასიკურად მორთული ჩარჩოები.

საძინებელი

მსგავსად ანტიკური ოთახის წყობისა, სადაც ცენტრში ხშირად ოთახის მთავარი დეტალია მოთავსებული, საძინებელშიც მსგავს წყობას შეხვდებით. ამ შემთხვევაში ოთახის ცენტრალური ფიგურა არის საწოლი.

საწოლი უნდა იყოს მასიური, ნათელ ფერებში და მაღალი ხარისხის ქსოვილებში გადაწყვეტილი. მსგავსად სხვა ოთახისა თუ დანიშნულების ავეჯის, საწოლის ფეხებიც გამორჩეულად ითვლება და ისიც მრავალი მორთულობითა და გაფორმებებით გამოირჩევა.

ძველი ბერძნების საძინებელში კედლებს ნულოვანი გაფორმება ახასიათებდა, რომაელების შემთხვევაში კი ეს ყველაფერი სხვაგვარად იყო. რომაელებმა, კედლების გასაფორმებლად გამოიყენეს ფრესკები, ფერწერული ტილოები და ბარელიეფები. თანამედროვე ვარიანტად ითვლება დეკორატიული თაბაშირით მორთული კედლები.