მცირე ზომის დახურული სივრცის (20-35 მ2) გასათბობადაა გათვლილი
მათი კონსტრუქცია ძალზე მარტივია. მოწყობილობა წარმოადგენს ჰერმეტულ მეტალის კორპუსს, რომელიც დაყოფილია სექციებად და გავსებულია მინერალური ზეთით. ძირითადად ის აღჭურვილია ორი გამაცხელებელი ელემენტით (ე. წ. ,,ტენით").

ელექტრული გამათბობლისგან გამთბარი ზეთი გასცემს სითბოს გამათბობლის კორპუსზე, მისგან კი თბება გარშემო ჰაერი, შემდეგ ეს თბილი ჰაერი მიიწევს ზემოთ და ვრცელდება მთელ ოთახში. მის ადგილს გამათბობელთან იკავებს ცივი ჰაერი და ყველაფერი მეორდება.

რაც უფრო მეტი სექცია აქვს რადიატორს, მით უკეთესია სითბოს გაცემა. გამათბობლები ერთნაირი სიმძლავრით და სხვადასხვა სექციების რაოდენობით, განსხვავებული დროის განმავლობაში ათბობენ ერთნაირი მოცულობის ოთახს. ცხრა სექციის მქონე რადიატორი, გაათბობს ოთახს უფრო სწრაფად, ვიდრე ხუთიანი, შესაბამისად, ცხრა სექციიანი რადიატორის კორპუსი გახურდება ნაკლებად, ვიდრე ხუთიანის.

სხვადასხვა დამატებითი ფუნქციის არსებობა, მის მოხმარებას უფრო მოხერხებულს ხდის, ზრდის მის მარგი ქმედების კოეფიციენტს (მქკ). არსებობს რადიატორები, მათშივე ჩადგმული ვენტილატორებით. ვენტილატორი ზრდის თბილი ჰაერის გავრცელების სისწრაფეს ოთახში - აჩქარებს მის გათბობას.
გათბობის დაჩქარებას ასევე ხელს უწყობს ე.წ. ,,ბუხრის ეფექტი''. ამის მისაღწევად ზეთოვანი გამათბობელი შეიძლება იყოს აღჭურვილი სპეციალური თერმონასვრეტებით, კორპუსის გვერდებზე და ზემოდან. ამის დახმარებით იქმნება ჰაერის დამატებითი გაწოვა, ჩქარდება კონვექცია, თბილი ჰაერი ოთახში სწრაფად ვრცელდება. ზოგიერთ მოდელს გააჩნია ციფრული დისპლეი, რომელზეც გამოისახება მითითებული, ან ოთახში არსებული ტემპერატურა, ასევე სიმძლავრის დონის ინდიკაცია. შესაძლებელია ასევე მივუთითოთ გამორთვის დრო.

პლიუსები: ზეთის გამათბობელი მუშაობს უხმაუროდ, გამორთვის შემდეგ დიდ ხანს ინახავს სითბოს და ითვლება ეკოლოგიურად სუფთად.