to top

მინიმალიზმი სტილი და დიზაინი ინტერიერში

გიორგისალთხუციშვილი
გიორგისალთხუციშვილი
მინიმალიზმი სტილი და დიზაინი ინტერიერში

ინტერიერში, მინიმალიზმი გახლავთ თანამედროვე სტილი, ტიპური მარტივი და მკაფიო გეომეტრიით, სადაც ვერ შეხვდებით ზედმეტ ავეჯსა და ნივთს, თუმცა მოიაზრებს ყველა იმ საჭირო ატრიბუტს, რომელიც გჭირდებათ ყოველდღიური, კომფორტული ცხოვრებისთვის. ინტერიერის მინიმალიზმში გადაწყვეტა საუკეთესო ვარიანტია პატარა სივრცის უფრო დიდად წარმოსაჩენად                                                                                                                                   

 

მინიმალიზმი სათავეს 1920 წლიდან იღებს და მის ოქროს ხანად 50-იანი წლები სახელდება, მაშინ, როდესაც იდეა და პრინციპი - „ არაფერი ზედმეტი“, ხალხში უფრო და უფრო პოპულარული ხდებოდა.  გენიალური კონცეფციისა და სიმარტივის წყალობით, მინიმალიზმი შექმნიდან 100 წლის შემდეგაც კი არ კარგავს პოპულარობას.

თუ გვსურს ბინის მინიმალისტურ სტილში მოწყობა, საჭიროა ვიცოდეთ დეტალები, რომლის გათვალისწინებაც დაგვეხმარება სასურველი შედეგის მიღწევაში:



  • ნაკლები ავეჯი, საყოფაცხოვრები ნივთების შემცირებული რაოდენობა, მეტი სივრცე და თავისუფალი ადგილი, ასევე, ნახატებისა და დეკორაციული გაფორმებების ნაკლებობა.
  • ფორმები: სწორი ხაზები, წრეები, გეომეტრიული ფიგურები.
  • მეტი ბუნებრივი სინათლე ოთახებში, ხელოვნური განათების განსხვავებული დონეები.
  • ნაკლები ფარდები ფანჯრებთან, შესაძლოა ჩანაცვლდეს ჟალუზებით.
  • ძირითადი ფერები: თეთრი, შავი, ნაცრისფერი, ხისა და მეტალის ფერები.

 

ფერები

მინიმალისტური ინტერიერის ძირითადი ფერები არამკვეთრი და მშვიდია, მინიმალიზმი ნაკლებადაა წარმოდგენილი მუქი და გამაღიზიანებელი ფერებით. აღსანიშნავია, რომ აქ ძირითადად თეთრი ჭარბობს, თუმცა მსუბუქი პასტელური ფერების გადანაწილებასაც ხშირად შევხვდებით. იატაკის საფარი ხშირად დიდი ფილებისგანაა შემდგარი, რაც ნაკლებ ჩრდილს წარმოქმნის და ადამიანისთვის უფრო სასიამოვნოდ აღქმადია.



ფორმები

ავეჯისა და სახლისთვის საჭირო ნივთების არჩევისას აუცილებელია გავითვალისწინოთ პროდუქტის ფორმა და ზედაპირის სტრუქტურა.

მინიმალიზმის მთავარი არსი სიმსუბუქესა და სიმარტივეშია, ხშირად ფორმები მარტივია და გეომეტრიული ფიგურებისგანაა მიღებული, აქ მთავარია, რომ ნებისმიერი კედლის თუ ნივთის ზედაპირი სისწორითა და ჰარმონიულობით იყოს სავსე. გამოყენებული ნივთებისა და ავეჯის შემცირება ინტერიერში ბალანსის დაცვას ართულებს, სწორედ ამიტომ, ძალიან მნიშვნელოვანი ნაწილია საგნებისა და ავეჯის პროპორციულად განთავსება, ვინაიდან არასწორი გადანაწილების შემთხვევაში ნივთები უფრო გამოსაჩენი ხდება და ამით მინიმალიზმის სადა სტრუქტურა ირღვევა.



განათება


მის გათვალისწინებით, რომ მინიმალიზმის მთავარი არსი სივრცის წარმოჩენაა, სწორედ სინათლე და განათება იძლევა მეტი სივრცული აღქმის შესაძლებლობას.


უკეთესი იქნება, რომ ფანჯრები შედარებით დიდი და ღია იყოს. თუმცა, ვინაიდან არსებული ფანჯრების შეცვლა რთული ან ზოგ შემთხვევაში შეუძლებელია, არსებობს უამრავი განათების სახეობა, რომელიც შეგვიძლია გამოვიყენოთ სახლის მინიმალისტური მოწყობის დროს, ხელოვნური განათება უდიდეს როლს თამაშობს ოთახებში ატმოსფერული, ფონური განათების შესაქმნელად.




სამზარეულო

სამზარეულო სახლში ბევრისთვის საყვარელი კუთხეა, მინიმალისტური სამზარეულოს არსი სიმარტივეშია, აქ ვერ შეხვდებით ზედმეტ ნივთებს ონკანთან, ყოველდღიურად გამოსაყენებელი ნივთები კი სათავსოებშია გადანაწილებული. სამზარეულოს მინიმალისტურ სტილში მოწყობისას არ უნდა დაგვავიწყდეს მინიმალიზმის ფუნდამენტური მნიშვნელობა და აუცილებელია გავითვალისწინოთ:

•    ჩაშენებული ტექნიკა, ადგილის დაზოგვის საუკეთესო საშუალებაა.

•    სამზარეულოს ხილულ ადგილებზე განათავსეთ მხოლოდ ის ნივთები, რომლებსაც ყოველდღიურად იყენებთ.




როგორც უკვე ვისაუბრეთ ამ სტილში არაფერია ზედმეტი . სტილი გამოირჩევა ლაკონურობით ყველგან : ავეჯში, ფორმებში და ფერებშიც.

 

მოგეხსენებათ ოთახის დაცარიელება არ გულისხმობს მინიმალისტურ დიზაინს, ეს არის მიმდინარეობა, სადაც  „გენიალურობა სიმარტივეში“ მართლდება და სახლს სიმშვიდისა და სიმყუდროვის შეგრძნებას სძენს.