ალბათ დამეთანხმებით, რომ ელექტრო სახრახნისის ფუნქცია საკმაოდ მნიშვნელოვანია, ის საგრძნობლად გვიმარტივებს სახლის საქმეებს, თუმცა იცოდით, რომ ჩვენთვის ნაცნობი საქმიანობის გარდა, ამ ხელსაწყოს გამოყენება კიდევ უამრავი მიმართულებით შეგვიძლია?

ახლა კი გაჩვენებთ, როგორ შეგვიძლია ელექტრო სახრახნისის გამოყენება, თუ საჭიროების შემთხვევაში, კრეატივსა და ფანტაზიას მოვუხმობთ.

მიქსერი

იმ შემთხვევაში, თუ სამზარეულოში არსებული მიქსერი დაზიანდა და ამ ეტაპისთვის არ მოგეპოვებათ მისი მსგავსი ხელსაწყო, არ ინერვიულოთ, უბრალოდ მოძებნეთ ხელსაწყოების ნაკრები და ამოარჩიეთ ჩვენთვის კარგად ნაცნობი - ელექტრო სახრახნისი.

ელექტრო სახრახნისის მუშაობის პრინციპი ასეთია, ინსტრუმენტის წინა მოძრავი ნაწილი მოიცავს მექანიზმს, რომელზეც შეგვიძლია დავამაგროთ დამატებითი, გამოცვლადი პირები და აქსესუარები. სწორედ ამიტომ, შეგიძლიათ გამოიყენოთ მიქსერის სათქვეფი პირი, რომელსაც შემდგომ სახრახნისზე დაამონტაჟებთ.

ელექტრო ხორცსაკეპი მანქანა

ჩვენთვის კარგად ცნობილი, მექანიკური ხორცსაკეპი მანქანის ელექტრო მოწყობილობად გარდაქმნა არც ისეთი რთული წარმოსადგენია, ვინაიდან ელექტრო სახრახნისი აქაც გამოსადეგია. ამისთვის დაგვჭირდება 10 – 15 სანტიმეტრის სიგრძის ხრახნი, რომლის ერთ ნაწილს მანქანის მჭრელი პირის მექანიზმს დავუმაგრებთ, ხოლო მეორე მხარეს სახრახნისთან დავაკავშირებთ. ესეც ასე, ელექტრო ხორცსაკეპი მზადაა.

საღებავის შემრევი

რა საჭიროა დამატებითი ხელსაწყოებისა და ინსტრუმენტების შეძენა, როდესაც გვაქვს კრეატიული და პრაქტიკული აზროვნება. სახლში ელექტრო სახრახნისის არსებობის შემთხვევაში არც საღებავის შერევა გახდება პრობლემა. ამისთვის კაუჭის მაგვარი ლითონისა ან პლასტმასის ჯოხი დაგჭირდებათ, ასევე მარტივი გამოსავალია ტანსაცმლის საკიდის გამოყენება, საკიდი ისე უნდა გაჭრათ, რომ ერთ მხარეს მოკაუჭებული დაბოლოება დარჩეს. ამის შემდეგ კი დაამონტაჟოთ სახრახნისზე.

გაითვალისწინეთ, რომ გამოყენების დროს სახრახნისი დაბალ სიჩქარეზე ჩართოთ, ამით თავიდან აიცილებთ საღებავის გაფანტვას.

ნაკაწრების მოშორება ავტომობილზე

ავტომობილის მფლობელებისთვის არსებობს ისეთი არასასიამოვნო მომენტი, როგორიცაა ავტომობილის დაკაწვრა, მოგეხსენებათ, სერვისცენტრში მინიმალური ნაკაწრის შეკეთებასაც  უამრავი თანხისა და დროის ხარჯვა მოჰყვება. ამისთვის კი არსებობს გამოსავალი! ელექტრო სახრახნისის კიდევ ერთი სასარგებლო გამოყენების გზა, მინი პოლირების აპარატად გადაქცევაა.

პირველ რიგში დაგჭირდებათ ჭურჭლის სარეცხი ღრუბელი, რომელიც აუცილებელია გამოჭრათ წრიულად და დაამაგროთ სახრახნისზე, გარდა ამისა დაგჭირდებათ სპეციალური პოლირების პასტა, რომლის შეძენაც ნებისმიერ ავტო-აქსესუარების მაღაზიაში შეგიძლიათ. წაუსვით პასტა დაზიანებულ ადგილზე და წრიული მოძრაობით დაამუშავეთ იქამდე, სანამ ნაკაწრები არ გაქრება.

მჭრელი დანები სამზარეულოში

ხშირია პრობლემა, როცა სამზარეულოს დანა კარგად აღარ ჭრის და გალესვას საჭიროებს, ელექტრო სახრახნისის დახმარებით აქაც ვისარგებლებთ.

საჭიროა, ხის ან რკინის მრგვალ ფირფიტაზე შემოვახვიოთ და დავაწებოთ ზუმფარა ქაღალდი. გაშრობის შემდეგ კი დავამონტაჟოთ ელექტრო სახრახნისზე. გამოყენებისას შეგიძლიათ აკონტროლოთ სიჩქარე, რათა სურვილისამებრ დაამუშაოთ დანის მჭრელი პირი.

როგორც ხედავთ, ელექტრო სახრახნისის გამოყენება მრავალი მიზნითაა შესაძლებელი.  პრობლემის შემთხვევაში არ არის აუცილებელი ახალი ინსტრუმენტის შეძენა ან ვინმესგან თხოვება, არამედ საჭიროა მის გადასაჭრელად კრეატიული და პრაქტიკული გადაწყვეტილებების მოფიქრება, რის საშუალებასაც ეს ხელსაწყო აუცილებლად მოგცემთ.