სამზარეულო, ადამიანთა დიდი ნაწილისთვის სახლის ყველაზე საყვარელ ადგილად ითვლება. მით უმეტეს თუ მზარეულობა თქვენი ჰობია და სამზარეულოში დიდ დროს ატარებთ - ეს ადგილი თქვენთვის ნამდვილად გამორჩეული ხდება. ამიტომ, ხშირად დგება ის მომენტი, როდესაც აღმოაჩენთ, რომ სამზარეულო არასაკმარისად ფუნქციურია და რაიმეს შეცვლაზე იწყებთ ფიქრს.

ჩვენი დიზაინერები გთავაზობენ 5 რჩევას, რომლის გათვალისწინების შემთხვევაში, თქვენს ბინაში არსებული სამზარეულო ოთახი უფრო ფუნქციური გახდება და ამასთან სივრცის ვიზუალური აღქმადობაც საგრძნობლად გაიზრდება.

გამოიყენეთ ღია და ნათელი ფერები.

დაბნელებულ და მუქ ოთახში შესვლისას ჩაკეტილი სივრცის შეგრძნება გვეუფლება, ღია და ნათელ ტონალობებთან კი - პირიქით. სწორედ ამიტომ, ვიზუალური აღქმის გასაუმჯობესებლად, ოთახში ინტერიერის მაქსიმალურად ღია ტონალობაში გადაწყვეტა ყველაზე აპრობირებული მეთოდია. ბოლო პერიოდში, ხშირად შეხვდებით თეთრი ფერის ან ღია ტონალობის სამზარეულო ოთახებს, ეს იმიტომ, რომ ღია და ნათელი ფერები სივრცის ვიზუალურ გაზრდას უწყობს ხელს და ამასთან თქვენს გუნება-განწყობაზეც დადებითად მოქმედებს. გარდა თეთრისა, შეგიძლიათ სხვა ფერის დამატებაც, ხშირად ბინის მეპატრონეები მეორად ფერს - მწვანეს ირჩევენ, რადგან მწვანე არის ფერი, რომელიც ბუნებასთან და სიმშვიდესთან ასოცირდება. გარდა ამისა, 2020 წლის ერთ-ერთ ყველაზე ტრენდულ ფერად არის მიჩნეული. თუ თქვენი სამზარეულო უკვე აკმაყოფილებს ზემოთ აღნიშნულ პირობას , მაშინ დროა შემდეგ რჩევებს გაეცნოთ.

დაამატეთ სარკეები

საკმაოდ ცნობილია, რომ სარკის განთავსება სივრცის გადიდების ერთ-ერთი ძალიან მარტივი და ეფექტური ხერხია. აღსანიშნავია, რომ სარკეების განლაგება, მსგავსად სხვა ოთახებისა, სამზარეულოშიც ეფექტურია და ვიზუალური სივრცის გაზრდის გარანტიაა. შეგვიძლია, მთლიანი სარკის როგორც კედელზე დამონტაჟება, ასევე სხვადასხვა ავეჯის ზედაპირზე გადანაწილება.

გამოიყენეთ ამრეკლი ზედაპირის ავეჯი და ნივთები

სარკის გარდა, მცირე ზომის სამზარეულოსთვის, რეკომენდებულია ასევე სხვა სახის ამრეკლი ზედაპირის მქონდე ავეჯისა და ნივთების გამოყენებაც, რაც სივრცის გაზრდის გამართლებული საშუალებაა. ავეჯის შერჩევისას სასურველია გაითვალისწინოთ, რომ ის კარგად ირეკლავდეს შუქს და თავისუფალი სივრცის დამატებით ეფექტს ქმნიდეს. ამგვარი ეფექტისთვის ასევე შეგიძლიათ გამოიყენოთ:

• შუშის ფილები

• ამრეკლი იატაკი

• მაღალი არეკვლადობის საღებავი

• მეტალის ზედაპირის სამზარეულო ტექნიკა

განათება

სამზარეულოს ვიზუალურად გასადიდებლად უმნიშვნელოვანეს როლს განათება ასრულებს. ვინაიდან, რაც უფრო მეტი სინათლეა ოთახში, მით უფრო დიდი მოცულობის სივრცე იგრძნობა. ბუნებრივი განათება ამ შემთხვევაში ყველაზე სასურველი დეტალია, ასე რომ, ეს შესაძლებლობა საჭიროა მაქსიმალურად გამოიყენოთ. გარდა ბუნებრივისა, დაამატეთ ხელოვნური განათებაც. სასურველია ნათურების მონტაჟი კედლის კარადების ქვეშ. ის სივრცული აღქმის ეფექტს გაზრდის და სამზარეულო ოთახი რეალურზე მინიმუმ ორჯერ დიდი გამოჩნდება.

გეომეტრიული ფორმები

გეომეტრიული ფორმები უფრო და უფრო პოპულარული ხდება თანამედროვე ხელოვნებასა და ინტერიერის დიზაინში, რისი გამოყენებაც მცირე სამზარეულოს მოწყობისთვისაც იდეალური გამოსავალია. გეომეტრიული ფორმები საშუალებას იძლევა თვალმა შექმნას პერსპექტივა და არსებული კედელი თუ იატაკი უფრო დიდი და სივრცული მოგეჩვენოთ.

აღნიშნული რჩევები წარმოადგენს საზარეულოს ვიზუალურად გადიდების ყველაზე მარტივ და ეფექტურ საშუალებებს. ზემოაღნიშნული რჩევების სრულად ან ნაწილობრივ გათვალისწინების შემთხვევაშიც კი, თქვენი საზარეულო ვიზუალურად იმაზე დიდი გახდება, ვიდრე ის მანამდე იყო. მხოლოდ განათებით ეფექტის შექმნაც კი შეიძლება საკმარისი აღმოჩნდეს თვალსაჩინო სხვაობის შესამჩნევად.