არმატურა ეწოდება ფოლადის ღეროვანი ან მავთულოვანი პროფილის ერთობლიობას, რომელიც გარკვეული კანონზომიერებითაა განთავსებული ბეტონის ნარევში. არმატურის ძირითადი დანიშნულებაა ბეტონის გაძლიერებით რკინაბეტონის ზიდვის უნარის გაზრდა. არმატურას იყენებენ ასევე წინასწარდაძაბულ რკინაბეტონის კონსტრუქციებში ბეტონში წინასწარი ძაბვების შესაქმნელად. არმატურას მოეთხოვება საიმედო კავშირი ბეტონთან (შეჭიდულობა) მუშაობის ყველა სტადიაზე;

ზედაპირის ფორმის მიხედვით განასხვავებენ გლუვზედაპირიან და პერიოდული პროფილის არმატურებს;

გლუვზედაპირიანია - A-I, B-I და B-II კლასის საარმატურე ფოლადი. მისი წრიული განივკვეთის ღერო გლუვზედაპირიანია .სიგრძე 6...12 მ, დიამეტრი 3…8 მმ (შეიძლება იყოს 25 მმ). გამოიყენება რკინაბეტონის კონსტრუქციებში, როგორც განივი არმატურა, აგრეთვე ფოლადის შენადუღი ბადეების დასამზადებლად

პერიოდული პროფილის არმატურის ზედაპირზე ღეროს სიგრძეზე, თანაბარ მანძილებზე (პერიოდულად) განლაგებულია ნაწიბურები ან ღარები, რაც უზრუნველყოფს უკეთეს შეჭიდულობას ბეტონთან.

დანიშნულების მიხედვით არმატურა შეიძლება იყოს:

• მუშა, რომელიც ინიშნება გაანგარიშებით და თავის თავზე ღებულობს მთავარ გამჭიმ ძალვებს;
• გამანაწილებელი (კონსტრუქციული), რომელიც აფიქსირებს არმატურის ცალკეულ ელემენტებს საჭირო მანძილებზე და ხელს უწყობს ბეტონის ნარევში ძალების თანაბრად გადანაწილებას;
•  სამონტაჟო, რომელიც გამოიყენება ნაკეთობების ასაწევად და ერთმანეთთან დასაკავშირებლად;
• ცალუღები (საკიდები), რომლებიც გამოიყენება რკინაბეტონის ფილებსა და კოჭებში ცალკეული ღეროების სახით, როგორც განივი არმატურა.