სამზარეულო ის ადგილია, სადაც ადამიანთა უმეტესობის დღე იწყება. ხშირად სამზარეულოს „სახლის გულსაც“ კი უწოდებენ. ეს ის ოთახია, სადაც საუკეთესოდ უნდა ერწყმოდეს ერთმანეთს ჰარმონია, კომფორტი და სისუფთავე. თუ თქვენ სამზარეულოს ფერებს არჩევთ, მანამდე გაითვალისწინეთ ოთახის მდებარეობა, ზომები და განათების დეტალები. სასურველია გაითვალისწინოთ, რომ შედარებით პატარა ზომის სამზარეულოს კიდევ უფრო ამცირებს მუქ ფერთა გამა და განათების სიმცირე.

გთავაზობთ დიზაინერების რჩევებსა და პოპულარულ ტრენდებს სამზარეულოს ფერებთან დაკავშირებით:

პასტელური ფერები.

პასტელური ფერების კომბინაცია ბოლო პერიოდში განსაკუთრებით პოპულარულია . ფაქტია, რომ ნაზი ტონალობები ოთახში ჰარმონიულ ატმოსფეროს და საუცხოო სიმშვიდეს ქმნის. შეგვიძლია, როგორც ორი ტონალობის შეხამება, ისე თეთრისა და სხვა პასტელური ფერის კომბინაცია.
 პოპულარულია ღია ცისფერი და ვარდისფერი, ნაზი იისფერი და მსუბუქი კრემისფერი ტონალობები. გამოარჩევენ პიტნის შეფერილობის ტონალობასაც, რომელიც სამზარეულო ოთახში მაღალი განწყობისა და დადებითი ემოციის შექმნითაა გამორჩეული.

თეთრი ფერი

თეთრი ფერის სამზარეულო, თავისი პოპულარობით, არ კარგავს მოწინავე ადგილის სტატუსს, ის კვლავ აქტუალურია და ბუნებრივია, მომავალშიც ასე გაგრძელდება. სადა, მინიმალისტური, მარტივი და თანამედროვე. ამ ყველაფრის გარდა თეთრი ფერი ოთახში სივრცის აღქმას უწყობს ხელს. ასევე, მარტივია თეთრი ფერის შეხამება სხვა ტონალობებთან. ასეთი ტიპის სამზარეულო, ძირითადად მინიმალისტური სტილის მოყვარულ ადამიანების იზიდავს.

იასამნისფერი.

ეს ის ფერია, რომელიც ბოლო პერიოდში უფრო და უფრო პოპულარული ხდება. იასამნისფერი შთამაგონებელ და დამამშვიდებელ როლს თამაშობს ადამიანის ხასიათსა და განწყობაზე. ბუნებრივია, ეს კონკრეტული ტონალობა სამზარეულოშიც ვიხილეთ. იასამნისფერი ტონალობა სამზარეულო ოთახს გამორჩეულს და საუცხოოს ხდის. დიზაინერები გირჩევენ, რომ ამ ტონალობასთან გამოიყენოთ ნაცრისფერისა და თეთრის სხვადასხვა ვარიაციები. ასევე მნიშვნელოვანია იასამნისფერი შემცველობის გადანაწილება ოთახში, ვინაიდან მუქ და გადამეტებულ ფერებს საპირისპირო თვისებები ახასიათებთ და ოთახში შედარებით მძიმე ატსმოსფეროს ქმნიან.

მონოქრომული ფერები.

მონოქრომული დიზაინი შედგება ერთი ძირითადი ფერის სხვადასხვა გრადაციებითა და ტონალობებით. მსგავსი ტიპის დიზაინს ხშირად შეხვდებოდით საძინებელსა და მისაღებ ოთახებში, თუმცა ბოლო პერიოდში სამზარეულოშიც გადმოინაცვლა და დიდი მოწონებაც დაიმსახურა.

ძირითადად ვხვდებით თეთრისა და შავის კლასიკურ კომბინაციას. ეს განუყრელი ფერთა წყვილი წლებია არსებობს ინტერიერის დიზაინში, თუმცა ბოლო წლების სტატისტიკამ გვაჩვენა, რომ ის უფრო და უფრო პოპულარული ხდება. შავისა და თეთრი ფერების ტანდემს ორგანულად ერწყმის ბუნებრივი ხის დეტალები, რაც საბოლოოდ ქმნის შესანიშნავ, მინიმალისტურსა და ელეგანტურ დიზაინს.

როგორც ხედავთ ინტერიერის დიზაინის ჰორიზონტზე მუდმივი სიახლეებია, თუმცა მათი გამაერთიანებელი დეტალი: სისადავე და სიმარტივეა, სწორედ ამიტომ, სადა და მსუბუქი ინტერიერის შექმნის შემთხვევაში თქვენი სახლი თანამედროვეობის შეგრძნებას დიდი ხნის განმავლობაში არ დაკარგავს