ეკო სტილი ინტერიერში ნიშნავს ეკოლოგიურს.იგი თანამედროვე სტილის დიზაინს მიეკუთვნება და ადამიანის ბუნებასთან დაახლოების საქმიანობაშია ჩართული, ეკო სტილის ინტერიერი ადამიანს ჰარმონიული განწყობის შექმნასა და დასვენებაში ეხმარება.

ეკო სტილი დიზაინში ბუნებრივი მასალების ეფექტურ გამოყენებას მოიცავს. რაოდენ გასაკვირიც არ უნდა იყოს, ის ადვილად ერწყმის მაღალტექნოლოგიურ, მინიმალიზმის ან ნებისმიერი სხვა თანამედროვე სტილის კონცეფციას. მასში შემავალი ბუნებრივი მასალები და თანამედროვე ელექტრონიკა ჰარმონიულად  ავსებს ერთმანეთს და შესანიშნავ, კომფორტულ ატმოსფეროს ქმნის.

ბინის მოწყობისას სასურველია გახსოვდეთ, რომ ეკო სტილი პირდაპირ არ ნიშნავს სახლის ბუნებრივი ხით შევსებას ან თაროებზე ყვავილების სიმრავლეს, მისი არსი უფრო ღრმაა და უამრავ დეტალს მოიცავს, რომელიც საბოლოოდ, თქვენს ბინას ბუნებრივ კუთხედ აქცევს.

ფორმები და ფერები

კონკრეტულ ინტერიერში უპირატესობა დამჯდარ, ბუნებრივ ფერებს ენიჭება - მწვანეს, ყავისფერს, ცისფერს , თეთრს და იმ ფერებს, რომლებიც ხშირად გვხვდება ბუნებაში.

ეკო სტილის ბინაში ხშირად შეხვდებით ნატურალური ხის ავეჯს, მათი ფორმა ხელოვნურად არ გამოიყურება, ტექსტურისა და ფორმის მიხედვით, სახლის კომპონენტები ბუნებაში არსებულ ერთეულებს ემსგავსება. ამ სტილის ავეჯის მთავარი თვისება მინიმალური დამუშავება და სიმარტივეა. 

ზოგადი გაგებით, ეკო სტილს არ შეეფერება დეკორაციული დატვირთვა, ამ ფაქტორით იგი საკმაოდ ახლოს არის მინიმალიზმთან, რადგან ბუნებაში არაფერია ზედმეტი. ქვისა და ხისგან დამზადებული კედლის საფარი სარკის მარტივი, ნატურალური მასალის ჩარჩოები, აბაზანაში განლაგებული მდინარის კენჭები და მსგავსი უამრავი დეკორატიული ელემენტია ეკო სტილში ხელმისაწვდომი. ასევე დიდი პოპულარობით სარგებლობს - ბუხარი, როგორც ბუნებრივი, ისე ბიო ტექნოლოგიით შექმნილი ბუხრები.

მასალები:

ეკო სტილი ბუნებრივ ჰარმონიას გარეგნული აღქმის გარდა, მასში შემავალი მასალებით აღწევს. ინტერიერის შესავსებად იყენებენ ბუნებრივ, ეკოლოგიურად სუფთა მასალებს, ისეთებს, როგორებიცაა:

 

• ხე
• ქვა
• კორპი
• ტერაკოტა
• კერამიკა
• მინა
• ქაღალდი
• დაწნული მასალა

კედლის საფარი - შესაძლოა გაფორმდეს მცენარეებისა და ყვავილების თემატიკის  შპალერით, ასევე შესაძლებელია კედლის კორპის პანელებით შევსება. პირველი ვარიანტი შედარებით ბიუჯეტურია, შესაბამისად შეგიძლიათ შეიძინოთ მაღალი ტექნოლოგიით დამზადებული, ეკოლოგიურად სუფთა შპალერი.

ჭერი- ხშირად დაფარულია თეთრი ფერის საღებავით, ფოტო-შპალერით  ან ხის პანელებით.

იატაკის საფარი- ძირითადად შეხვდებით ხისგან დამზადებულ იატაკს ან ეკოლოგიურად სუფთა ლამინატს. ასევე ქვის ან კერამიკული ფილებით მოწყობილ იატაკის საფარს.

განათება

ეკო ინტერიერის აუცილებელი მოთხოვნა - ოთახში ბუნებრივი შუქის დიდი რაოდენობით არსებობაა. თუკი ეს საკმარისი არ არის, აუცილებელია დაამატოთ ხელოვნური განათების წყაროები. მოერიდეთ დიდი ზომის, დატვირთულ ჭაღებს.

ეკო სტილში პოპულარულია წერტილოვანი განათების ტიპები, ჩაშენებული და უხილავი სანათები, ასევე ჭერის ატმოსფერული განათებები

სამზარეულო

ამ სტილის მთავარი მიზანი, სახლში ბუნებრივი ატმოსფეროს შექმნაა. სწორედ ამიტომ, სამზარეულოს მოწყობისას გაითვალისწინეთ შემდეგი დეტალები:

• ბუნებრივი მასალით დამზადებული სამზარეულოს ავეჯი და დეკორაციები
• სწორად გადანაწილებული სინათლე, როგორც ბუნებრივი, ისე ხელოვნური
• ყურადღებით შერჩეული, ბუნებრივი მასალით დამზადებული დეკორატიული ელემენტები.
• მცენარეების განთავსება ინტერიერში

სამზარეულოს ავეჯი სასურველია მარტივი ფორმებით გამოირჩეოდეს, როგორც აღვნიშნეთ ეკო სტილი საკმაოდ ახლოს დგას მინიმალიზმთან, თუმცა მხოლოდ სამზარეულოს მაგალითიც კმარა მათ შორის განსხვავების დასანახად. მიმიმალისტურ სტილში პოპულარულია ამრეკლი ზედაპირის ავეჯი, ეკო სტილში კი ეს ყველაფერი უფრო ბუნებრივია, ავეჯისთვის ხშირად ირჩევენ ხის მასალას - მინიმალური დამუშავებით. სამზარეულო ტექნიკა ხშირად ჩაშენებული სახითაა წარმოდგენილი, ამ ტიპის ტექნიკა სასურველია როგორც სივრცის დაზოგვისთვის, ისე მყუდრო და მინიმალისტური გარემოს შესაქმნელად.

რაც შეეხება განათებას - იმ შემთხვევაში თუ სამზარეულო ოთახი საკმარისად ნათელი არ არის, გამოიყენეთ ხელოვნური LED განათება, თუმცა დაიმახსოვრეთ, რომ მათი დიზაინი ეკო სტილის პრინციპებს უნდა ითვალისწინებდეს. დიზაინთან ერთად მნიშვნელოვანია განათების ფერიც, დიზაინერები გვირჩევენ, რომ გამოვიყენოთ თბილი და საშუალო ფერის განათება.

სააბაზანო

ბუნებრივი ფერები, სიმარტივე, მინიმალისტური ავეჯი და კარგი განათება - ასე უნდა გამოიყურებოდეს აბაზანის დიზაინი ეკო სტილში. დასაწყებად ზოგჯერ მხოლოდ და მხოლოდ სწორი მასალის არჩევაც საკმარისია.

სააბაზანო ოთახში ეკო სტილი გაძლევთ საშუალებას გამოიყენოთ იმიტაციური მასალები, მაგალითად: შეგიძლიათ აბაზანა კერამიკული ფილით მოაპირკეთოთ, თუმცა სასურველია მას ხის ეფექტი გააჩნდეს. ამ მარტივი მეთოდის დახმარებით, პრაქტიკულობას და ბუნებრივ ატმოსფეროს სველ წერტილშიც შეინარჩუნებთ. სველი ზონის მოშორებით შესაძლებელია თაბაშირ-მუყაოს გამოყენებაც, თუმცა ის აუცილებლად უნდა შეიღებოს ტენიანობის მდგრადი საღებავით.

ეკოლოგიური და ჰარმონიული ატმოსფეროს შესაქმნელად გამოიყენეთ - ქვა. ის კარგად გადმოსცემს ეკო სტილის მნიშვნელობას და ბუნებასთანაც საკმაოდ დაგაახლოვებთ. მაგალითად: აბაზანის ირგვლივ გამოიყენეთ თეთრი ქვები, სასურველია ქვების დიამეტრი არ აღემატებოდეს 3-4 სანტიმეტრს. შედეგი საკმაოდ სასიამოვნოა ნებისმიერი ტიპის ეკო სტილის სააბაზანოსათვის.

საძინებელი

ეკო სტილის საძინებელის მოწყობისას არ არსებობს განსაზღვრული წესები და აკრძალვები, გარდა ერთისა, გამოიყენეთ მხოლოდ ნატურალური და უვნებელი მასალები ოთახის ინტერიერის შესაქმნელად. საძინებელ ოთახში საკმაოდ პოპულარულია - ხე.

ამ სტილის საძინებელში ხშირად შეხვდებით ბუნების თემატიკის ფოტო-დეკორს. პოპულარულია ასევე ბალახისა და მწვანე საფარის კედელზე განთავსებაც. გარდა ხელოვნური დეკორაციებისა სასურველია განათავსოთ ოთახის მცენარეებიც.

ბუნებრივია, ნატურალური ხის ავეჯის შეძენა საკმაოდ დიდ თანხებთანაა დაკავშირებული, თუმცა გამოსავალი ყოველთვის არსებობს. თუ ფანტაზიას და კრეატიულობას მოუხმობთ, ამ გამოსავალს ყოველთვის იპოვით. მაგალითად, ინტერნეტში საკმაოდ დიდი პოპულარობით სარგებლობს პალეტებისგან შემდგარი საწოლები. მოიმარაგეთ პალეტები და გააკეთეთ სასურველი სიმაღლის, ზომისა და ფერის საწოლი.