სანამ სახლში რემონტს დაიწყებთ, მნიშვნელოვანია იცოდეთ, თუ რა ხარჯებთანაა დაკავშირებული სახლის რემონტი, ვინაიდან კარგად ნაცნობმა ბიუჯეტმა შესაძლოა გავლენა იქონიოს რემონტის ტიპსა და მასშტაბზე.

როგორი რემონტი გსურთ?

ძირითადად არსებობს ორი ტიპის რემონტი: კოსმეტიკური და კაპიტალური... პირველ რიგში უნდა განსაზღვროთ რემონტის ტიპი, როგორ რემონტს საჭიროებს თქვენი საცხოვრებელი? დაფიქრდით თუ რამდენად მასშტაბურ ცვლილებებს გეგმავთ თქვენს ბინაში. კოსმეტიკურ რემონტში ხშირად ინტერიერის აღდგენითი სამუშაოები შედის, რაც მოიცავს: შპალერის გამოცვლას, კარ-ფანჯრების შეცვლას ან რესტავრაციას, ჭერისა და კედლების შეღებვას, იატაკის აღდგენით სამუშაოებს. ხოლო კაპიტალური რემონტი კონსტრუქციულ ცვლილებებს მოიცავს, რაც გაცილებით შრომატევადია და ბუნებრივია გაცილებით დიდ თანხებთანაა დაკავშირებული.

რაც შეეხება ინტერიერის დიზაინერის მომსახურებას, კოსმეტიკური რემონტის დროს არ არის აუცილებელი დიზაინერის დახმარება, თუმცა იმ შემთხვევაში თუ სახლში კაპიტალურ რემონტს აპირებთ, ინტერიერის დიზაინერი ამ შემთხვევაში სასურველია, ვინაიდან კონსტრუქციულ და სარემონტო სამუშაოებს სჭირდება პროფესიონალის ჩარევა და დაკვირვება. ამის გარდა ინტერიერის დიზაინერი თავიდან აგარიდებთ გაუთვალისწინებელ შეცდომებს და ბუნებრივია ხარჯებსაც.

კოსმეტიკური რემონტი

როგორც ზემოთ ვახსენეთ, კოსმეტიკური რემონტი არ მოიცავს კონსტრუქციულ სამუშაოებს და მასში შედის ზედაპირული, აღდგენითი ტიპის საქმიანობები. მაგალითად: თაბაშირ მუყაოს ჭერის მონტაჟი, მისი ფასი 1 კვადრატულ მეტრზე დაახლოებით 15 ლარია, ამის შემდეგ ხდება ფითხის წასმა, რაც კვადრატული დაახლოებით 8-დან 10 ლარამდე მერყეობს და საბოლოოდ შეღებვა, რომელიც საშუალოდ, კვადრატული მეტრი 5-6 ლარი ღირს.

რაც შეეხება შპალერს, ძველი შპალერის მოშორება სახლის პირობებში თქვენც შეგიძლიათ, ახალი შპალერის გაკვრა კი, ამ ეტაპზე, კვადრატულ მეტრზე 4-დან 6 ლარამდე ღირს. რაც შეეხება მასალებს მათი არჩევა თქვენზეა დამოკიდებული, მათი ფასი ხარისხისა და დიზაინის მიხედვით განსხვავდება.

კოსმეტიკური რემონტის დროს ხშირად შევხვდებით იატაკის საფარის რესტავრაციას ან სულაც ახლით ჩანაცვლებას. დღესდღეობით ლამინატის ინსტალაციის ფასი 1 კვადრატულ მეტრზე 8 -დან 10 ლარამდე შეადგენს, ლამინირებული იატაკის ფასები კი განსხვავებულია, რაც მოთხოვნის მიხედვით იცვლება. პარკეტის მონტაჟი უფრო დიდ სირთულესთან ასოცირდება, შესაბამისად მისი ინსტალაციის ფასი 15-დან 17-ლარამდე მერყეობს. ასევე საჭიროა პლინტუსების განთავსებაც, რაც გრძივი მეტრი 2-დან 4-ლარამდე ღირს.

კაპიტალური რემონტი

კაპიტალური რემონტი უფრო მასშტაბური ხასიათისაა და მის დასაწყებად საკმაოდ დიდი მობილიზება გმართებთ, ამ შემთხვევაშიც არსებობს სხვადასხვა სირთულის პროექტები, მაგალითად: კედლების დამუშავება, დემონტაჟი, იატაკის შეცვლა, ელექტრო და სანტექნიკის გაყვანილობები ბუნებრივია უფრო რთულია ისეთ ინტერიერის სამუშაოებთან შედარებით, როგორებიცაა: დეკორატიული ჭერისა და თაღების მონტაჟი და ა.შ.

ფასები აქაც განსხვავებულია და თითოეულ საქმიანობას განსხვავებული ფასი აქვს, მაგალითად:
გთავაზობთ ადგილობრივი გამოკითხვის შედეგად მიღებულ საშუალო ფასებს, ფასები მოცემულია 1 კვადრატულ მეტრზე დაანგარიშებით

• კედლის დემონტაჟი  - 10 - 20 ლარი.
• კედლის აშენება (ბლოკი) - 40 თეთრიდან 80 თეთრამდე.
• კედლის აშენება (აგური) – 20 თეთრიდან 40 თეთრამდე.
• ლესვა - 6 – 10 ლარი.
• თაბაშირ მუყაოს დამონტაჟება -  5 – 9 ლარი.
• იატაკის მოჭიმვა - 8 – 12 ლარი.
• ფილების მონტაჟი - 25 - 45 ლარი.
• ლამინატის მონტაჟი  - 8 – 10 ლარი.
• სანტექნიკა (წერტილი) – 30 ლარი.
• პარკეტის მონტაჟი - 15 – 17 ლარი.
• პლინტუსის განთავსება 2 – 4 ლარი.
• კარების მონტაჟი  (ერთეული) – 50 ლარი.
• ჭაღის მონტაჟი - 20 – 30  ლარი.
• აბაზანის აქსესუარების/ავეჯის მონტაჟი - 50 – 100 ლარი.
• გათბობის ქვაბის მონტაჟი - 100 – 200 ლარამდე.
• გათბობის პანელური რადიატორების მონტაჟი - 50 ლარი.
• იატაკის მოხვეწა -  8 – 15 ლარი.
• რემონტის შემდეგ დასუფთვება - 100 – 150 ლარი.

ვფიქრობთ აღნიშნული ბლოგი დაგეხმარებათ რემონტის დაწყებისთვის საჭირო ბიუჯეტის დასათვლელად. თუმცა შესრულებული საქმის გარდა ასევე მნიშვნელოვანია სარემონტო მასალებისა და პროდუქტების ფასები. სწორედ ამიტომ, სარემონტო მასალების ჰიპერმარკეტი მიჰაუსი გთავაზობთ თქვენთვის საჭირო, უამრავი დასახელებისა და უმაღლესი ხარისხის პროდუქციას შეღავათიან ფასებად.