სამზარეულოს მოწყობა შრომატევადი პროცესია და უამრავ დეტალს მოიცავს. ხშირად სამზარეულოს რემონტის შემდეგ აწყდებით პრობლემებს, გაუთვალისწინებელ შეცდომებს, რომლის გამოსწორებაც ორმაგ ენერგიას, თანხასა და დროს მოითხოვს. ამ ყველაფრის თავიდან ასაცილებლად ეს ბლოგი დაგეხმარებათ, უმჯობესია წინასწარ იცოდეთ და გაითვალისწინოთ სამზარეულო მოწყობის დეტალები, რათა არ მოგიხდეთ ხელახალი სარემონტო ან მოსაპირკეთებელი სამუშაოების ჩატარება.

განათება

განათების გადანაწილების  დროს მნიშვნელოვანია ბუნებრივი სინათლის არსებობა. ეცადეთ მაქსიმალურად მოაქციოთ სამზარეულო ოთახი ბუნებრივი განათების ცენტრში - შექმენით მაქსიმალური პირობები იმისთვის, რომ ბუნებრივმა განათებამ ოთახში მარტივად შემოაღწიოს. რაც შეეხება ხელოვნურ განათებას, ამ დროს აუცილებელია მიმართული განათებით აღვჭურვოთ ის ადგილები, სადაც ყველაზე ხშირად მოგიწევთ ყოფნა, მაგალითად: გაზქურის ზონა, საჭმლის მოსამზადებელი ადგილი და რა თქმა უნდა, მაგიდის სივრცე. მიმართული განათების გარდა, ასევე საყურადღებოა ზოგადი განათების შექმნა, რასაც ძირითად შემთხვევაში ჭაღი უზრუნველყოფს, ჭაღის არჩევა თქვენს გემოვნებაზეა დამოკიდებული, თუმცა ინტერიერის დიზაინერები გირჩევენ, რომ არჩევანი მინიმალისტური დიზაინისა და მარტივი აგებულების ჭაღზე შეაჩეროთ, ვინაიდან მოხმარების მხრივ ასეთი ტიპის განათება სამზარეულო ოთახში ბევრად კომფორტულია.          

კარადები

როდესაც დრო კარადების შერჩევაზე დადგება, აუცილებელია გაითვალისწინოთ კარადების სიმაღლე, პირველი რეკომენდაცია ასეთია: გამოიყენეთ იატაკზე და ჭერზე მიბჯენილი კარადები, ეს კონკრეტული მოგცემთ საშუალებას მაქსიმალურად აითვისოთ სივრცე  და რაც მთავარია შეუშლის ხელს მტვრის დაგროვებას, ვინაიდან კარადასა და იატაკს შორის არსებული თავისუფალი ადგილი ხელს უწყობს მტვრისა და ცხიმის ნაწილაკების დაგროვებას. ასევე, კარადების შერჩევისას ყურადღება მიაქციეთ სახელურებს და გაღების მექანიზმებს, ვინაიდან დიზაინისა და ვიზუალური ნაწილის გარდა სამზარეულოს კარადის ფუნქციური მხარეც ძალიან მნიშვნელოვანია , არსებობს გავრცელებული პრობლემა კარადების გაღება-დაკეტვის შესახებ, როდესაც მეზობელი კარადების ერთდროულად გაღება-დაკეტვა შეუძლებელია ან  რომელიმე კონკრეტული კარადის გასაღებად სხვა მეორე სათავსოს გაღებაა აუცილებელი, ამიტომ საჭიროა ყურადღება მიაქციოთ იმ ფაქტს, თავსდება და ფუნქიონირებს თუ არა კარადები არსებულ სივრცეში, ვინაიდან ამ დეტალის უგულებელყოფა, შემდგომ, ყოველდღიური მოხმარებისას უდიდეს დისკომფორტს შეგიქმნით.

იატაკი

არსებობს  უამრავი იდეა სამზარეულოს იატაკის საფართან დაკავშირებით.  სამზარეულოში საკმაოდ ხელსაყრელია კერამიკული ფილა, რაც კონკრეტული ოთახის სპეციფიკისთვის ოპტიმალური ვარიანტია. ადვილად იწმინდება და უსაფრთხოების თვალსაზრისითაც გამართლებულია: არ არის აალებადი, განსხვავებით ხისა და ლამინატის იატაკისგან. იმ შემთხვევაში, თუ ლამინირებული იატაკი მოგწონთ, აუცილებელია გაითვალისწინოთ ხარისხი და შეარჩიოთ ნესტგამძლე ტიპის ლამინირებული იატაკი. სურვილის შემთხვევაში შეგიძლიათ აირჩიოთ კომბინირებული იატაკის განაწილება და სამუშაო ზონა კერამიკული ფილით შემოსაზღვროთ, დანარჩენი სივრცე კი - ხის ან ლამინირებული იატაკის მასალით.

როზეტები და ჩამრთველები

  წინასწარი გათვლების წყალობით თავიდან აირიდებთ ჩამრთველებისა და დენის წყაროს სიმცირესა ან თუნდაც არარსებობას. ამისთვის საჭიროა კარგად წარმოიდგინოთ ავეჯის მომავალი განლაგება და ზომები, რის მიხედვითაც გადაანაწილებთ ჩამრთველებს, არ დაგავიწყდეთ, რომ დენის წყაროების დამატებით არახილულ ადგილებში განაწილება სამომავლოდ შესაძლოა წინდახედულ ნაბიჯად ჩაითვალოს.

ავეჯისა და ტექნიკის განაწილება

სამზარეულოში ავეჯისა და ტექნიკის გადანაწილება ერთ-ერთი ძალიან მნიშვნელოვანი ეტაპია. პირველ რიგში გასათვალისწინებელია მაცივრის, გაზქურისა და ნიჟარის განლაგება და დაშორება. დიზაინერების რჩევით, ისინი მინიმუმ 60 სანტიმეტრით უნდა იყვნენ დაშორებული ერთმანეთისგან, ასევე მნიშვნელოვანია სამუშაო ზედაპირისა და კედლის კარადას შორის მანძილი, აქ მინიმუმად 38 სანტიმეტრი ითვლება, სტანდარტულ მანძილად კი -  46 სანტიმეტრია გათვალისწინებული.

Იმედი გვაქვს კონკრეტული რჩევები გამოგადგებათ, გახსოვდეთ, რომ წინასწარ სწორად და  კარგად გათვალისწინებულ დეტალებს რემონტის დროს უდიდესი მნიშვნელობა ენიჭება, სწორედ ეს გაძლევთ შესაძლებლობას, გვერდი აუაროთ რემონტის შემდეგ აღმოჩენილ პრობლემებს და თავიდან აირიდოთ გაუთვალისწინებელი ხარჯები, დრო და ენერგია.